袋盡近四千萬薪俸離場 錢大康稱拒絕公開與學生對話係「唔想做SHOW」

本來喺2010年以「年紀不輕」為理由辭任科技大學副校長,及後轉戰香港大學,最終成為眾所周知嘅教育界打工皇帝浸會大學校長錢大康,終於隨住2020年結束喺本月底退休。雖然任內佢都甚少露面同師生對話,臨走就接受《星島日報》專訪話,最痛心係社會撕裂依舊、人與人之間仍未有對話,有必要「sit down and talk(坐低傾)」。佢形容,過去五年半擔任浸大校長「係一段收穫之旅」。「經歷唔少挑戰,慶幸自己有機會體驗,如果時光倒流,我仍會做同樣選擇。」

錢大康喺各間大學「打完仗之際」宣布二○年任滿後退休。年近七旬嘅錢大康聲稱唔續任純粹出於年齡考慮,並非逃避社運爭議。佢仲話處理社運危機係佢任內最難忘記憶,「一生人都未必能『享受』一次,要考慮點去斡旋、調停,點去拆解,呢啲都冇諗到自己會有機會經歷,係好具挑戰性嘅。」

錢大康喺上年8月7號聲援被捕學生會會長方仲賢嘅集會上,拒絕譴責或投訴警察叉頸濫用暴力,而堅稱有「自己方式」幫助方仲賢。多番追問下,錢大康方透露「自己方式」係喺今日(8號)朝早9點前致電任職警察嘅朋友幫忙,並承諾致電後會即時交代。最終錢大康仍未有交代佢所謂行動嘅結果。

 

上年8月,特首林鄭月娥提出構建對話平台,邀請浸大校長錢大康出席會議。然而浸大學生會會長方仲賢就直指,大部分同學唔承認校長錢大康能代表浸大,佢喺早前校內集會上,完全無視學生的訴求,其代表性已經蕩然無存。

目睹校園、街頭被佔領,甚至出現汽油彈,錢大康自然講到好痛心,又話遺憾至今未見社會修補撕裂。早前佢喺最後畢業禮上致辭,亦寄語社會應摒棄「你對我錯」的成見,「對話很重要,坐低傾很重要,能夠避免撕裂,找出事件為何發生。」同容海恩「各人有各人嘅良知」一時瑜亮,飽遭恥笑。又指年輕人、警方和政客等在這事件佔重要角色,盼大家不要各自圍爐取暖,「要有不同意見的交流,互相尊重彼此,讓對方有空間解釋自己意見,接受對方的不同意見。」

不接受與學生對話變做show
回首過去五年半,錢大康自稱經歷過掀校政改革而獲學生好評嘅「蜜月期」,都遇過校內大小風波,其中兩年前處理抗議普通話畢業要求,以及去年就反修例被要求公開表態兩役,同學生交鋒最甚。錢大康話,身為校長不能偏袒任何一方,只能跟原則處事,不涉及政治考量,「唯獨不可接受與學生的對話溝通變成做show」,去年嘅公開對話後,改為私下面見學生。」

學生罵仍覺是收穫

錢大康笑指,有親戚話他做校長吃力不討好,仲要俾學生罵,但自己仍覺得咁係一段收穫之旅,「我唔會用其他事物來交換,如果時光倒流,我仍會做同樣嘅選擇。」佢話唔會避開呢啲挑戰,反而很慶幸有機會體驗。「儘管當時感痛心,但痛心都係人生經驗嘅一部分,唔會有『嘅做就好啦』嘅諗法,呢五年半亦令我反思良多,退休後我會記掛學生同同事嘅。」

 

雖然錢大康終於撤手教育界,但之前佢都積極參與政治,曾經加入香港前行政長官董建華同梁振英牽頭成立「香港再出發大聯盟」加入成為大聯盟發起人,希望集合各界意見,讓香港喺「抗疫防暴」中謀求出路。公益方面,喺城大高層前日宣布今年每月捐人工後,其餘七間大學高層都一齊宣佈會捐人工以幫助校內需要經濟支援嘅學生。浸大山神統計各大捐人工比例,發現喺七大中,浸大捐款比例為全港最低,亦唔似得其他大學咁全數支援貧苦學生。