《全民造星》十強拉票 K LAU:我主張唱多啲廣東話歌

全民造星III喺今晚將會係十強嘅決賽,喺之前預賽、50強、20強都有好多參賽者演唱各種語言嘅歌曲,廣東話歌唔算太多。K LAU今年係第二次參賽,佢個人喺音樂有唔少提升嘅同時,亦改以廣東話RAP做主打。昨日接受報章訪問嘅時候,更加直言自己主張唱多啲廣東話歌,希望大家投佢一票。

參賽者K LAU(劉瑞祈),今年佢一直以廣東話Rap作主打

佢喺受訪影片到話:「HELLO大家好係我全民造星III十強參賽者K LAU。今年嘅我開始慢慢搵到自己嘅方向同喜愛嘅事,我都依然會喜愛跳唱,依然好鍾意見到喺台上好有火好有正能量嘅我自己。如果你哋之前我都希望你喺決賽入面投我一票,因為我都算係喺十強參賽者入面,其中一個我會係主張唱多啲廣東話歌啦,同埋我係會想喺每一隻上台嘅作品入邊,就算佢係唔係原創都好,我都想加我自己內心嘅想法去話畀你哋知K LAU係一個乜嘢嘅歌手或者表演者。如果你都感受到我呢張熱誠嘅話,希望你哋可以26嘅總決賽入邊投我一票。」

另外,參賽者Mischa同陳葦璇早前都透露會唱廣東話歌。葦璇會決定挑戰Solo唱慢歌,展現同跳唱唔同嘅一面。Mischa就話:「今次決賽其中一首廣東話歌會唱自己嘅故事,因為很多時唱英文歌,好少唱廣東話,希望同觀眾連繫多一啲。」

有分析指,香港市場慢歌多快歌少,所以唱新歌難以喺舞台上展示舞技兼唱功;而且廣東歌難唱,有九個音調嘅廣東話喺演唱起上來比國語歌及英文歌難駕馭。縱觀上一集《全民造星II》決賽,僅有李祉均(Oscar)全程自選項目均以廣東話歌參賽。今次第三季多咗歌手事先揚言唱廣東話歌,令人期待。