全球真加速!2020年地球自轉速度創新高 2021繼續加速

人常道世事加速,原來地球都真係加緊速!有科學家發現,地球2020年自轉速度真係有紀錄以嚟最快,仲預計2021年嘅自轉速度可能會更快。
據《今日美國》報導,自1960年代發明高精確度嘅原子鐘後,人類終於可以有精準方法計算年月日有幾耐,得出每日地球轉一圈以86,400秒為準。但呢個方法都唔太可靠,因為地球嘅自轉速度都變緊。國際地球自轉服務(IERS)嘅計時員喺1970年起,要增加「閏秒」使地球嘅自轉速度跟上時間。
地球嘅轉速度近10年來,原本呈現下降趨勢,越轉越慢,近年最後一次增加「閏秒」係喺2016年12月31日,但係而家地球就開始加速返自轉,可能需要「負閏秒」令原子鐘跟返地球自轉速度。
據了解,2020年年中起,每天嘅秒數均不到86400秒,2020年7月19日比完整嘅24小時短少1.4602毫秒,係原子鐘有紀錄以來最短嘅1日,打破2005年7月5日短少1.0516毫秒嘅紀錄。地球而家平均每日自轉時間都唔使86400秒。英國物理學家衛伯理(Peter Whibberley)就話:「如果地球自轉速度繼續提高,有機會需要『負閏秒』。不過而家話要搞都言之尚早嘅。」

有研究指,地球自轉速度同地核、海洋、大氣層呢啲複雜嘅氣候活動有關,亦都受月球等等嘅天體作用影響,所以可以搞到每日轉速都唔同。又有研究指,全球暖化融冰會令轉速有些微影響。

 

0 0 votes
Article Rating