史丹福大學師生發起聯署 成功拯救廣東話課程

早前因為史丹福大學冇同廣東話老師續約,引起該校師生憂慮廣東話課程存續嘅憂慮,繼而發起聯署請願;喺超過3,000人聯署請願下,史丹福校方回應訴求,承諾會喺下學年開辦兩個廣東話課程。

據校園傳媒《史丹福日報》報道,聯署發起人指,史丹福大學冇直接回應長期開辦廣東話課程嘅要求,開設廣東話全職導師,以及以廣東話滿足學校語文學習要求嘅訴求。佢哋會繼續爭取令到廣東話課程得以長久延續落去。

本身史丹福大學係以疫情下預算緊絀為由,喺12月唔再同廣東話班講師張錫莉博士續約。張錫莉博士喺史丹福已經教咗廣東話超過廿一年,亦都唔會接受校方計時薪請佢返來開班嘅做法。

超過1,540名史丹福師生及校友簽咗聯署,亦都有大概1,500名校外人員包括亞洲研究學者同亞裔機構工作員,反映呢個課程對於個人、學術同專業皆有影響。

屢獲殊榮嘅作家Celeste Ng喺作家話,喺當今中國政府喺到打壓廣東話、推行普通話嘅形勢下,史丹福大學嘅決定係「恥辱」(Shame)。

聯署發起人耶魯大學公共衛生助理教授Jamie Tam、中文博士四年級生同人類學博士一年級生Jocelyn Lee就話,當佢哋聽到下年或者唔開廣東話課程個消息,佢哋都既震驚,又傷心。

Jamie Tam助理教授讚張錫莉老師同個課程好正,佢本科生嗰時讀咗「影響一生」,因為呢門課令佢同祖母傳統都可以保持連結。佢話:「呢個唔係普通一堂課。我哋一齊去唐人街、博物館,呢一班猶如一個社區,所以我有消息先牽起咁大嘅情感。」

佢話缺乏歷史文化意識,就會好似史丹福大學咁嘅教育機構睇低廣東話。「社會其實有個更大嘅問題,就係唔當廣東話係一種語言同傳統。啲人以為中國人都係一模一樣,以為我哋會講同一隻話。」

人文科學院發言人張禮頓(Joy Leighton)表示,雖然語文中心唔一定每季都會開班,但意識到廣東話班都有一定需求,所以諗住提供現有四個廣東話課程嘅其中兩個。之前語文中心主任伊莉莎白(Elizabeth Bernhardt-Kami)就喺一封電郵同張錫莉博士講,唔理學生幾大需求,都係睇預算狀況去決定語文中心提供到幾多課程。

 

0 0 vote
Article Rating