喺上年9月開學嘅時候，因為內蒙古實施漢語取締蒙古語嘅教育政策，引來蒙古人大規模罷課同公民抗命運動，但最終政府並冇聽蒙古人嘅訴求，反而用搵軍警鎮壓、宵禁同埋通緝參與嘅學生。今個新學期，內蒙古政府將運動成因歸究喺中小學歷史教科書問題，宣布將一批「強調個體民族身分」嘅歷史教科書停用。

內蒙古自治區教育廳喺1月8號公布「關於停止使用《內蒙古歷史與文化》等自治區中小學地方課程教材的函」，話喺上年9月秋季國家教材委員會對地方課程做咗意識形態審查，指責呢啲歷史書歷史階段分期同全國統編教材不一，鑄牢中華民族共同體意識不夠突出，刻意強調個體的「民族身份」同「民族意識」」，闡述中華民族共同性不足。

經審查後，教育廳決定由2021年春季學期起即時停用《內蒙古歷史與文化》、《蒙古族歷史》《河奪靈史與文化》等地方教材，由9月秋季課程起停用講述城市歷史嘅《呼倫貝爾歷史與文化》《科爾沁歷史與文化》。

上年11月，蒙古教育廳嘅高層出現人事變動，內蒙古師範大學黨委書記黃雅麗，接替被突然免職嘅侯元，出任教育廳黨組書記，並提名出任教育廳廳長。

內蒙古近年硬推以普通話為主的教育政策，八月底嘅新政策，更要求當地以蒙古語講書嘅學校，喺新學期改用普通話講書教授。不過，蒙古人並冇逆來順受，作出一連串嘅反抗運動，包括聯署抗議，學生罷課示威等。然而府亦唔退讓，通緝學生同家長，威誘學生復學。抗議期間不時爆發警民衝突，甚至有蒙古官員、家長同學生自殺明志，堅拒高壓嘅推普政策。