陳茂波林鄭同場論壇 「特首黑馬」李小加被串唔識廣東話 「唔合格」

《香港01》今日舉辦經濟論壇,好多權貴高官都甚畀面金主于品海,于老闆亦都意氣風發咁主持講座,更加笑臉勁串之前盛傳係「特首黑馬」嘅李小加唔識廣東話係「唔合格」,收購倫敦交易所係「失敗」。

本來上月紫荊黨空降搞發布會,分析指係為同屬「海歸派」嘅李小加兵分兩路,為日後佔據行政、立法做鋪墊。當時已有報道指建制派中人就唔多服氣,質疑佢哋本身都唔係香港人,有乜資格「空降」政壇:「嚟咗香港咁多年都唔學廣東話,學乜人從政啊?唔好話市民唔妥,我哋建制派都唔服啦!」

今次于品海喺開幕致詞亦都對嘉賓就甚唔畀面。除咗勁串李小加之外,仲指點江山,話「領導層和高級公務員不能成為香港改革的包袱,香港不能成為中國的包袱。」又發表青蛙論,話「香港有好多講英文嘅青蛙,以為見到幾個講英文嘅法官就係有司法獨立。」同場嘅另一隻黑馬陳茂波同林鄭都唔知算唔算倖免於難。

有政界人士分析,除了漸漸浮出水面嘅一兩個人選,尚有數名有意參選嘅「黑馬」也值得關注,包括公務員事務局局長聶德權等等。據報道亦有建制派人士竟然提議由警務處處長鄧炳強跨越數級,直接登上特首之位。