澳洲公營嘅電台SBS一直都設有各種民族語言嘅頻道，包括普通話同廣東話，近日計劃將兩條頻道合併。有網民喺網上發起呼籲，促請SBS可以停止呢個合併嘅做法，並且質疑有關做法會破壞廣東話節目組編採自主。
聯署發起人Alan Lo就寫話，喺澳洲同全球講廣東話嘅人，其實都對廣東話人嘅身分同語言受到嘅威脅感到擔憂，而最近見到有一筆資金入主導致廣東話台同普通話台合併。佢質疑既然電台多咗資金同資源，應該可以繼續開放兩條頻道，為澳洲嘅兩大華人社區服務。
佢又話，SBS有單獨旁遮普語同北印度語嘅頻道同網頁，同樣道理都應該適用於保留廣東話台。
佢又話新政策會同澳洲尊重多元文化同種族嘅精神背道而馳。既然澳洲放寬咗移民政策去容納被打壓嘅香港人，澳洲就會收納越嚟越多講廣東話嘅人。SBS係應該忠於服務各個族裔需求嘅使命。
支持廣東話！