ISO係制定世界標準嘅國際標準組織，有咗ISO係方便各國各地嘅製造商可以跟隨研發互相通用嘅產品。《華爾街日報》透露，香港就有專家喺2019年向ISO提交廣東話打字嘅標準方案，但就俾中國嘅代表千方百計咁阻撓。

中國代表隨即提出反對，就話中文嘅國際標準只係有普通話就夠，因為普通話先係中國嘅官方語言。於是其後各國代表討論有關方案。香港代表解釋，廣東話同普通話即使用類似嘅漢字，但其實互不相通，所以係兩種唔同嘅語言，應該有唔同嘅標準。

但有三名知情人士透露，會上出現咗異常多人嘅中國代表團，佢哋準備咗幾十張投影片去攻擊廣東話打字方案，好多與會者感到非比尋常，亦都有啲不安。中國代表團就話，方案嘅打字系統得香港人用緊，中國其他地區嘅6000萬廣東話人口就冇用，所以唔應該成為國際標準。

最終方案得到咗美國、加拿大同俄羅斯等國家支持，但因為行政程序上有問題不獲通過。但香港方案嘅支持者冇死心，5月再次向委員會介紹有關方案，到咗9月喺法國委員會終於得以通過。

但冇耐，俄羅斯喺冇解釋之下就撤回支持，亦都冇回應到傳媒查詢。