今日政府終於逼市民用佢哋發明嘅「安心出行」（LeaveHomeSafe）電話程式，規定出門口去唔同地方就要打卡。一直以來大家又係覺得好奇怪嘅點，點解有廣東話「出門」唔用，要用「出行」？係咪好似叫地帶做「小區」咁，夾硬跟大陸用詞？

跟大陸就梗喇，但其實大陸個「出行」，亦都唔係林鄭個「出行」咁解。

首先，呢個詞語喺大陸都唔算常用，因為其實大陸都係講開「出門」嘅，因為出字同行字本身都可以解太多意思，所以反而口語都好少用。

人總係望文生義嘅。「出門」令人生動咁諗到離開屋企，「出行」又會聯想到遠行、旅行，所以呢兩個詞語自古以來都已經分開咗兩個唔同嘅意思，用咗千幾年都唔會混淆。

例子——

《論語》：「子曰：『出門如見大賓，使民如承大祭。』」

《論語注疏》: 「孔曰：『子路反至其家，丈人出行不在。』」

（可以舉嘅例子太多，不能盡錄。但就真係兩隻字併埋咁簡單，好難混淆。）

咁林鄭點樣創造呢個歷史「新語」（newspeak）呢？我估計，好可能佢哋睇到啲大陸call車程式「滴ｘ出行」咁熱門，就有樣學樣，貪現成執個好啲嘅名。

政府以為跟晒大陸用語，方便大陸人就最好，殊不知大陸抄風盛行，成千上百叫做「ｘｘ出行」嘅Call Apps出現，真係搵着個大陸人嚟睇，佢都好可能會以為「安心出行」係一個Call車App，返唔到酒店開嚟「打的」；或者會以為係出入境嗰種「出行」先要打卡。

為咗緊貼呢個「新語」，政府而家喺新聞公布都記者會都改口，將一切「出門」都叫做「出行」。就如童話入面一個國王唔着衫就出門，周圍同人講自己着咗新衫咁荒謬——唔係指鹿為馬嘅機心詭計，只係做咗國王嗰個人，本身真係好戇鳩。

現實好荒謬，但喺語文角度睇，呢單嘢只係一個小學雞級數嘅笑話。

文／陳樂行

－－－－－－－－－－－－－－－

訂閱港語學文化頻道，每個月只需$38＋，持續支持語言調查報告及文學活動，用行動捍衛廣東話：https://www.penana.com/user/80736/