盆菜本來係圍村習俗，但近年香港城市人都越來越流行喺團年飯或者大小聚會食盆菜。我哋逐慚將呢件事習以為常，唔會諗有咩深意。但原來喺人類學家眼中，盆菜係好有深層嘅社會意義。

哈佛大學華琛教授（James L. Watson）係人類學家，喺中國鎖國嘅六十年代，為咗研究華夏傳統習俗，嚟到當時世上少數保留到村落風俗嘅地方，英屬香港嘅圍村。

因為人類學研究，重視田野考察多過問卷調查，佢特登住喺圍村去體驗當地風俗，自然食咗咁多盆菜。

第一次食盆菜，佢就見證住一個移咗民嘅百萬富翁，踎喺農夫同工廠工人之間，一齊插筷子食盆菜，當中冇儀式、冇複雜飲食禮儀，冇特別主人家同致詞。

久而久之，佢產生咗一個疑問：「點解咁下欄嘅食物，會成為圍村人結婚生仔必食嘅重要儀式？」

呢啲都同廣東人有好多精緻嘅飲食文化，例如酒樓宴會好唔同。佢認為村民當時好有意識咁保存呢道低級菜餚，係因為盆菜有好重要嘅社會功能。

【盆菜係廣東話人嘅身分認同】

當華琛同廣東人問及盆菜嘅時候，佢發現廣東人會特登講：「客家人唔識得點樣煮食盆，只有地道嘅廣東人先知道煮食嘅秘方。」

華琛認為，盆菜係一個重要機制，將廣東人同其他競爭嘅族群分開。

【盆菜係令人人平等嘅方法】

華琛留意到，比起其他廣東宴會要等老人家、客人、姻親依次食先，盆菜係打破所有隔閡，就好似將食物撈喺同一個煲咁，食盆菜嘅人無分階級撈埋一齊。

佢指出住圍村嘅人貧富懸殊，食盆菜就可以維持和諧平等嘅氣氛。

佢好生動咁描述食盆菜點樣泯滅地位嘅差別：「甚至最有錢嘅商人同位高權重嘅政治人物，都要放下身段，定期同村民一齊食：同其他人一齊踎喺地，翻找盆中食物，搵一塊好味嘅雞肉。」

華琛教授引用研究話，中國同印度都係以階級為主嘅社會，但咁富裕嘅珠三角地區居然出現咗呢種講求平等嘅飲食文化。雖然盆菜唔係廣東文化唯一表達平等信息嘅儀式，但可能係最好嘅例子。

華琛食嗰盆菜至今都有六十幾年，盆菜都由圍村嘅秘製菜演變成大小酒樓都有得賣嘅菜，亦都喺市區團年飯、公司飯、朋友聚會常見嘅宴會形式。

雖然材料都已經有好大傳變，但華琛教授個結論仍然發人深省——當老細請你食盆菜，原來唔係但求好味，而係食緊一種平等。呢種同撈同煲嘅平等文化，都係值得香港人珍重嘅一種香港精神。（當然，好食係良知，燒鴨變鴨胸真係無法接受）

文／陳樂行

參考資料：Watson, J. (1987). From the Common Pot: Feasting with Equals in Chinese Society. Anthropos, 82(4/6), 389-401.

延伸閱讀：《鄉土香港——新界的政治、性別及禮儀》華琛、華若璧