【細說「新語」：優化】
「優化」呢個詞語，基本上喺中國大陸俯拾皆是，大至政策改動，小至網站更新都會見到。就如《1984》作者奧威爾（George Orwell）寫極權政府用嘅「新語」（newspeak）咁，「壞(bad）」呢個詞語消失，得返「好（good）」、「好上更好（double plus good）」，真係衰嘅嘢頂多講「不好（ungood）」，嗰啲改善、改錯，好似暗示以前做錯咁，通通不用。
到底優化一詞實質點解？用呢個詞正正就係貪佢唔知點解。舊時點衰，而家點改，唔好理，總之政府就係推緊啲好嘢出嚟，遲啲就會變好啦。
港府近年用優化都越來越多，喺講究意頭嘅廣東話社會，係好反常嘅做法。香港用正體字「優」，讀落一個「憂」，寫出嚟偏旁又一個「憂」，憂上加憂，都幾唔老黎。
睇返象形，憂係將心思展現於顏面（頁）字，加埋個企人邊，會意就係一個戲子。而家日文、韓文而家都仲保留呢個用法，例如男演員、女演員會叫男優、女優。先秦時期有個「瀀」字，有水多、潤澤之意，喺俾漢代逐漸用形音相近嘅優字取代，於是優字就變成可以解豐裕，慢慢引伸做「良好」咁解。
中國又砌咗一套「簡體會意」嘅講法，話尤有突出嘅意思，優嘅簡體「优」係「人加尤」指，指突出嘅人嚄——以為避開個憂字就冇咗負面意思，殊不知仲衰多兩錢。中國文化入邊，突出、怪異都唔方好，尤字自古都有怪責、過錯之意。正所謂「怨天、尤人」，邊忽好？
大陸仲好興用「乜乜化」，因為任何名詞、形容詞加個化字，就搖身一變成為一個動詞——最啱用嚟作口號，唔使嘥咩心機，搵個聽落幾正嘅名詞，加個化字已經了咗件事。繼而生出強化、深化、現代化、科學化……係要做乜嘢動作，具體點樣行動？語意不明，無從稽考。
英文optimize同improve喺大陸都會不由分說譯做優化，兩個詞義大不相同，撈埋一齊更加原意盡失。譯improve通常會用改善、改進、改良等等。其中我幾鍾意「改善」一詞，隱有「過而能改，善莫大焉」之意。
Optimize本為數學用語，一向譯做「最佳化」；如果用喺日常事物都可以用完善，甚至成語臻於至善、盡善盡美。至於優化，根本失卻optimum嗰個「最」嘅意思，用咗只會有更混淆，越講越唔清。
文／陳樂行
#優化 #改善 #最佳化 #細說新語 #廣東話 #正體字 #簡體字
－－－－－－－－－－－－－－－
訂閱港語學文化頻道，每個月只需$38＋，持續支持語言調查報告及文學活動，用行動捍衛廣東話：https://www.penana.com/user/80736/