店舖唔識普通話都唔得？平等機會委員會前幾日就向立法會提交本年工作進度報告，透露研究緊點樣保障「內地中國人」喺香港唔會俾人歧視，指出喺疫情期間有食肆拒絕招待來自大陸、講普通話嘅顧客，引發喺社交媒體「欠缺包容」嘅討論。平機會認為「此等煽動性言論及行動」只會令社會衝突及分裂加劇」，必須予以制止，例如研究喺《種族歧視條例》內增設「居民身分」嘅「保障特徵」。
舊年光榮冰室曾經張貼告示「本店職員只懂廣東話，亦不會解釋餐牌，不便之處敬請原諒」，被指唔接待淨係講普通話嘅食客，引起討論。平機會主席朱敏健當時就曾經撰文話通告可能「假設所有內地客人都染上肺炎」，又話「大部份說普通話的人都是華裔人士，有關告示可能歧視華裔人士」。講咗咁多嘢，但喺缺乏法律基礎下，最終平機會都無採取任何行動。
舊年光榮冰室張貼嘅告示
根據《種族歧視條例》，「種族」的定義是指一個人的種族、膚色、世系、民族或人種，「語言」並非條例下所界定嘅「種族」定義。
港語學主席陳樂行認為，光榮冰室當時嘅告示十分之有禮貌，唔明白如何構成歧視。「香港人母語係廣東話，唔識其他語言都唔出奇啫，咁都犯法？」佢亦批評平機會今次研究改例只係保障大陸人，但對日常歧視香港人嘅行為視若無睹。「浸會大學要香港學生普通話過門檻先可以畢業，但大陸學生就乜嘢語言要求都唔使，投訴咗三年，平機會有冇理過？」
佢慨嘆而家嘅社會環境同電影《十年》嘅情節無限接近，當中一節＜方言>描述香港人因為母語係廣東話飽受歧視嘅生活。故事講述2025年，所有香港計程車司機必須應考國家語委普通話水平測試，唔合格者要貼上非普（非普通話計程車司機）標誌，而且喺工作中受盡欺凌同限制。
另外，平機會仲打算修改啟動法律程序嘅方式。大陸中國人受歧視及中傷嘅投訴通常都係由第三者，喺冇可識別受屈人提出投訴下，平機會現時其實唔可以自行就呢啲做法採取法律行動。平機會希望改例後令佢可以自行將佢覺得歧視嘅行為拎上法庭。
#平機會 #歧視 #歧視大陸人 #歧視香港人 #普通話 #唔識普通話 #種族歧視條例 #浸會大學 #普通話畢業門檻 #hkbu