Facebook 封殺澳洲新聞網站 抗議澳洲擬立法規定網絡平台巨頭要課金畀傳媒

噚日(17日)Facebook宣佈,唔會再畀澳洲傳媒同用戶分享新聞連結,以回應澳洲政府擬立法規定臉書等網絡平台須課金畀當地傳媒。澳洲政府今日回應指面書手法太過火,亦會自傷聲譽;但會繼續同Facebook磋商。

Facebook澳洲及新西蘭經理伊斯頓批評,澳洲政府誤解公司平台同新聞發行者嘅關係,唯有採取行動,令澳洲用戶冇辦法喺Facebook睇當地或國際嘅新聞。

好多澳洲嘅傳媒頁面、同埋部分澳洲政府機構變成空白,防疫同消防部門無法即時公布重大訊息。澳洲財長佛登堡(Josh Frydenberg)就痛鬧Facebook話:「Facebook錯咗,佢哋根本冇必要咁做。咁做太過火(heavy-handed),佢哋只會傷害自己喺澳洲嘅聲譽。」

另一邊廂,Google就已經妥協,喺同日宣佈同三大澳洲主流媒體達成收入分享協議,所以可以繼續喺Google睇到佢哋旗下嘅新聞報道連結。

0 0 votes
Article Rating