荷蘭孔子學院被揭發要脅教授「教學研究違反中国法律或損害中國形象可被解僱」 議員炮轟違反學術自由

早前喺荷蘭,香港留學生聯署請願,要求格羅寧根大學(University of Groningen )同孔子學院解除合約,引起當地關注。近日孔子學院就被踢爆,同教職員簽嘅合約竟然要脅話「教學研究違反中国法律或損害中國形象可被解僱」 ,被議員炮轟違反學術自由。荷蘭教育部揚言定必跟進,「不容討價還價」。

當地傳媒搵到份由孔子學院出部分人工嘅教授合約,合約寫明禁止教授損害中國形象,如果教授嘅教學同研究「嚴重違反中国法律或嚴重損害中国形象」,中方可以單方面終止任用該為教授,仲要中国教育部直屬嘅国家漢語國際推廣領導小組辦公室(漢辦)有權決定幾時炒人。

教育部部長范安高蘇芬(Van Engelshoven)表示非常關注,會盡快同格羅寧根大學會面。「每間大學都有法律責任去保障學術自由,呢樣嘢係冇得討價還價。我諗大學要遵守呢啲法律責任。」佢哋都會研究呢種合同係咪違反咗荷蘭嘅勞工法例。

荷蘭眾議院議員促請教育部部長盡快徹查,議員范美蘭(Van Meenen)話:「(中国)如果用呢種方式影響我哋嘅教育,真係不可接受。」

范希佛(Van Helvert)議員就認為,呢單嘢表現咗「中国點樣透過海外国民去用唔正當嘅方式獲取情報,同埋點樣嚴密限制學術自由。」佢認為學生都受到監視, 「好似監視啲維吾爾人咁。」

喺格大嘅香港學生早前發起聯署,呼籲大學唔好再同中国孔子學院合作,因為中国透過緊呢樣嘢干預師生。

發起聯署嘅香港學生為咗保障人身安全,唯有匿名。佢哋接受港語學訪問時話,支持荷蘭政府採取行動,保障學術自由,亦都要求大學公開交代:「唔好再官腔講we are not aware of any issues 咁。」

萊頓大學同格羅寧根大學分別係荷蘭第一同第二古老嘅大學,而格大地理環境非常接近德國,相信如果格大都成功踢走孔子學院嘅話,將會重挫孔子學院喺荷蘭及德國擴大勢力嘅如意算盤。

荷蘭而家有兩間孔子學院,喺格羅寧根同馬斯垂克。萊頓大學喺2019年終止咗孔子學院嘅所有合作。由於喺多國都有報道,中国利用呢啲做情報間諜工作,喺美國、比利時已經踢走咗好多間孔子學院。

綜合報道(荷蘭傳媒NOS、港語學獨家訪問)