今日2月21號係聯合國教科文組織所定嘅「國際母語日」，提倡要尊重國民學習同使用母語，全球各國都有響應嘅活動。台灣隆重其事，年年都揀喺母語日前後舉行「原住民族語言發展會議」；而大陸就冇乜官方嘅活動，只有中央電台呼籲話「語言有戰略意義」，要「寫對中国字」。

 

台灣：原住民族語言發展法見成效 「相信原住民語言是不可或缺的聲音」

總統蔡英文同行政院長蘇貞昌都參與咗原住民族語言發展會議，而今次會議首次參照聯合國會議模式，除咗中英文外，仲用阿美族、排灣族等6種語言同步口譯，係台灣官方會議嘅首例。

行政院長蘇貞昌致詞話，「文化是民主的靈魂、語言是文化重要載體，每人出生聽到語言就是媽媽的話，母語傳承是一代又一代，因此說「母語斷、文化滅」，如何讓母語延續，除了每個人要努力，也是國家責任。」

蘇貞昌笑言，唔單止係公務，佢屋企都要講母語，連小朋友都係咁：「只是沒想到我那麼推動，我的大女兒愛上了阿美族人，2個孫女都用阿美族命名，我們家第三代沒有漢名。」

佢又話好高興原住民族嘅南島語系語言得到國際學者認證有朔源：「這是台灣在防疫成果被肯定後的另一個資源，期待台灣更努力讓世界看到。」

蔡英文就話，政府投入更多資源，推動原住民族語言發展，等學校有專責嘅母語老師，各族都成立族語推動組織。

佢感謝各界投入母語工作人員：「當越來越多人使用母語，政府投入預算才有意義，讓原住民語言發展落地生根，一起找回族語，也相信原住民語言是台灣不可或缺的聲音。」

原住民族委員會主委夷將·拔路兒（Icyang Parod）就話：「作為南島語族的起源地，語言的多樣性是台灣送給全世界最美的禮物，讓我們一起努力推動族語，讓南島語言在台灣發出最美的聲音。」

 

大陸轉為低調處理 「一起學好中国話 寫對中国字」

以往大陸都比較積極響應國際母語日嘅活動。喺2014年，央視新聞喺社交網站出咗篇文，話60%以上嘅民族語言面臨消失，又貼出一組寫有中國各地語言嘅圖片，呼籲大家「保護中國各地方言」。「地方語言瀕危」成為一時話題。

大陸2020年9月喺內蒙古推行漢語教學，蒙古人發起大規模罷課嘅蒙古語運動，最終經歷鎮壓；加上集中營迫害維吾爾人嘅事件引起國際關注，「保護母語、地方語言」喺大陸都開始變成會觸及底線嘅話題。

今年2021年，大陸官方機構就再冇慶祝國際母語日活動，得返中央人民廣播電台嘅新聞稿，但題目竟然係「一起學好中国話 寫對中国字」，竟然話「漢語是我們的母語」，無視中国有嘅唔同民族以及地方語言，對聯合國設立「國際母語日」嘅目的，係咪有啲誤解？

聯合國教科文組織：鼓勵使用多種語文

聯合國教科文組織將本年主題定為「鼓勵使用多種語文，促進教育同社會嘅包容性」，呼籲世上每一個人讀書同日常生活中都用多啲唔同語言，弘揚文化嘅豐富多彩。

教科文組織總幹事阿祖萊指出，目前，全球仍有40%嘅人口無法用自己嘅母語上堂學習，「呢啲情況好影響學習質量，亦都阻學生了解自身嘅文化傳統同表達方式。」新冠疫情威脅

阿祖萊又話，受到肺炎疫情影響，全球一度有多達15億適齡學童返唔到學校、亦都冇遙距方式上堂。好多傳統節日同慶祝活動被迫取，威脅文化多樣性，衝突傳媒同文化工作者。

佢話：「一種語言嘅消亡，亦意味住一種視角、一種感受和一種對於世界的思考隨之消失，意味著文化多樣性遭受咗不可挽回嘅損失。」

聯合國教科文組織（UNESCO）喺1999年訂立國際母語日，呢一日特別係紀念到孟加拉人喺1952發起「國家語言日遊行」，最終有多名學生被軍警射殺而犧牲。