中國一直聲稱有「五千年文明」,但商朝之前嘅所謂「夏朝」已經搵唔到任何文字,談何文明。因此尋找夏朝文字一直被列為國家級任務,但發掘多年都未有成果。

近日,中国學者李維明聲稱喺二里頭陶片上發現文字,但不出一日考古研究所就澄清話係用黑色筆寫嘅記號,並為引起誤會深表歉意。

李維明喺上個禮拜三發表《二里頭遺址祭祀陶文初識》一文,話喺2000年二里頭遺址掘出嚟嘅陶片發現有「文字」,仲可解讀為「在土用蛇、六(條或次)舉行告祭」。

 

但不出一日,考古隊就出文致歉,話呢啲「文字」其實係用黑色筆寫嘅考古編號「00ⅢT1H22」。佢哋承認「早年整理資料過程中,確有不規範之處,對大家使用資料進行研究時,造成誤解,對此深表歉意。」但都堅持會喺二里頭搵到文字:「李先生認為二里頭文化存在文字,我們贊同這一觀點,將在今後的田野考古工作中更加關注有關細節」。

陶片留下的痕迹(箭嘴示)其實是工作人員用記號筆留下。
陶片上面的確係有文字,不過係考古隊人員寫落嘅。
李維明指陶片痕迹(左)與古代文字符號(右)相似。
李維明認為文字應該係古代蛇嘅象徵。

有傳媒亦都指李維明有唔着,未睇過實物,淨係睇相就喺到判斷古字迹。睇返資料,李維明的確係古字專家,有歷史學博士,曾經做過中國國家博物館原學術研究中心副主任,研究館員,2003年喺商代牛肋骨嘅刻辭上,發現第11個殘存文字。

負責發掘嘅中國社會科學院考古研究所二里頭工作隊,係屬於最高嘅國家級學術機構。

二里頭遺址喺發現頭廿幾年裏,學界普遍認為係商都,但近三四十年就「達成共識」係夏都。喺入邊都掘到好多銅器同玉器。不過,喺呢啲器具上都未係好似商朝搵到甲骨文咁,搵到當時嘅文字去證明真係屬於另一個朝代。

今次被大陸傳媒形容為「考古界最大的烏龍事件」。有網民表示,學術應該嚴謹,「誰都會有錯誤,但這事有損學術界公信力,貽笑大方」。

 

0 0 vote
Article Rating

港語學

                           

作者介紹

訂閱
提示
guest

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料

0 Comments
Inline Feedbacks
View all comments