山神夫人:點解要有女?

〈山神夫人信箱-點解要有女?〉

「山神夫人:

其實,點解要咁執著有冇女?如果自己一個都活得好既,何須有女?
有人話唔媾女,就生唔到仔,生唔到仔就會絕種。但而家個世界,就係太多人,所以先咁多物產分配既問題,咁多人捱餓,咁多人受苦,咁多人含屈。
不如諗下,媾女究竟為咩?係為唔被人笑,抑或真心愛人,願意為愛情不惜一切?

山民上」

可憐嘅山民:

一句到尾:你是A,也是0。因為是0,你先會問媾女為咩;因為是A,你先會反問何須執著,何須有女。

你亦問得好,溝女──夾硬搵話題Whatsapp,勉強搵機會見面,晚晚睇佢嘅ig,日日諗佢嘅事,到底為咩?就算浪子般嘅山神本人,都未能回答你。呢個唔係A嘅人先會問,拍咗拖都會問,到底溝女、拍拖,做咁多嘢係為乜,點解兩個素不相識嘅人,要夾硬走埋一齊。

但當一個人拍過拖,分手以後,反而唔會計較當初付出。經歷歡趣別苦,佢會問,點解明明相愛,偏要分開。如果你問佢溝女為咩,或者佢會好簡單答你:鍾意咪溝,想一齊咪拍拖,唔需要執著成敗,唔使怕俾人笑。HKBU Secrets都成日有呢D酸葡萄文,都奉勸一句:如果你冇鍾意嘅人,你可以繼續酸,安慰自己,冇女的確無乜不不了;若果你有,咁就唔好怕俾人笑,去擔張梯將葡萄摘下啦。

山神夫人