〈山神夫人信箱－旅行篇〉

「山神夫人：

點睇而家啲山民去旅行嘅風氣？

山民上」

迷惘嘅山民：

是咁的
作為一個成日身痕想去旅行既無雀腳仔
小妹有啲感受想抒發 歡迎理性討論
或者交流旅行心得 或者撩我一齊出走都cum… come

話說近幾年既旅行模式 由經旅行社報團食玩瞓瞓瞓
轉變到搶廉航平機票 窮遊 深度遊乜乜乜

最近睇到篇文章話有首位女性環遊世界就黎行勻196 個國家
我覺得佢好西利 但係令我驚訝既係樓下既留言
幾乎清一色都恥笑緊佢走馬看花 只係路過 去黎無意義

其實點解旅行係愈平愈好呢 點解旅行一定要捐窿捐罅呢
要放鬆或者想陪二老做孝子既 咪報團舒舒服服囉
要窮遊既 咪揹個背囊買張機票出去截便車couchsurfing 囉
要影相爬山深度遊既 咪長槍短炮帳篷仔去攀山涉水囉
大家追求唔同 旅行方式無話邊個更高尚嫁喎

唔想比咁多錢 鍾意尋幽探秘係你既事
人地鍾意打卡到此一遊 鍾意瞓四季酒店日日食自助餐
鍾意特登搭機去飛田新地同妹妹深入文化交流 點都好
你有咩資格有咩理據批評人地既旅行係無意義既呢
道理同你鍾意譚仔 佢鍾意三哥一樣姐
都係食米線 都係旅行 鹹魚青菜各有所愛咁解姐

總結 旅行高唔高汁呢 係衡量各人消費力同需求既
子曰一千個讀者眼中有一千個哈姆太郎呀嘛
每個人對旅行既意義都會有唔同既解讀
當然 如果你有窿路平啲享受同樣既服務 讚你 係本事囉

延伸閱讀 張飛人<<女朋友為咗對廉航嘅堅持，同我鬧交>>
<<港女日本搭廉航手提行李超重！身上無日圓、 信用卡，全靠日本地勤好人順利回港>> 話你乜乜驚你嬲典型飯後笑話

雖然方丈份人 好聽啲叫隨意 難聽啲叫求奇
不過一直以黎出走都叫死好彩 無乜撻Q
如果同我一樣獨自去偷歡 記得提高警覺
另外正所謂錢解決到既問題就唔係問題
海外提款記得開 信用卡記得帶 八成問題輕鬆解決
記住前人教訓 超重無錢走呢篇新聞 我可以笑三年

仲有窮遊呢家野 小心偷雞唔成蝕把米
如果有旅伴 記得確保所有人都接受到呢個質素

黎緊sembreak 繼續毒在異鄉為異客
我自己就覺得 睇到自己想睇既野 我就滿足嫁啦 HEHE

山神夫人

＊　＊　＊　＊　＊　＊　＊　＊　＊　＊　＊
浸大山神現開設山神夫人信箱，由情感豐富嘅山神夫人，用佢嘅冰雪聰明，為你解答校園、感情以致生活各種難題。

歡迎來信或pm，電郵地址為：hillgod@life.hkbu.edu.hk，主旨請注明「山神夫人信箱」