一六年四月,山神發起公投,要求撤銷完全唔合理嘅普通話畢業要求

一六年四月,山神發起公投,要求撤銷完全唔合理嘅普通話畢業要求。聲勢鋪天蓋地,九成同學支持撤銷普通話畢業要求,逼使校方設立「大學語文政策檢討小組」,話會準備回應民情⋯⋯

一七年二月,「大學語文政策檢討小組」公佈,有計劃保留普通話門檻,並會設立普通話豁免考試。喺山神再三質詢下,學校高層喺德高望重嘅老師見證下,承諾「普通話豁免試」只屬過渡性質,「唔會刁難學生」,「預期合格率達九成」。

一七年九月,「豁免試」接受報名,為咗免役,四百名額喺十五分鐘內搶註一空。

一八年一月,「豁免試」成續出爐。合格率僅達三成。七成同學未能透過豁免試達到畢業門檻。喺下個學期,數以千計嘅學生仍然要為普通話唔達標,為擔心延誤畢業憂心忡忡。

兩年過去,科大、城大、理大接續通過公投,要求開設廣東話中文班,都獲得校方積極回應,取得部分成果。

最近幾日,連海外都傳嚟喜訊,台灣政大都通過埋廢止「國立政治大學外語畢業標準檢定辦法」。

浸大嘅普通話畢業門檻,環顧全球各間大學,都最為苛刻。無一間大學好似浸大,會因為普通話水平唔似北京腔(三級甲等)而拒絕頒受學位。

廢除普通話必修嘅呼聲,亦喺浸大最早出現。然而去到今日,當所謂「豁免試」嘅合格率,居然遠遠比普通課程低,仲要唔畀重考嘅時候,三百幾隻應試嘅白老鼠,只係運咗個大桔。

二零一七年五月十七日,浸大山神撰文《千祈唔好入浸大》,其中提到普通話試話:「只有浸大仍然死攬門檻,繼續殘害學生。如此野蠻,點入得過?」二千多人讚同文章,引起高層震動。

以為浸大會痛定思痛,決心快手改革課程。點知所謂改革,只不過係空頭支票;豁免曙光,只係黑箱作業,坑殺同學嘅一個玩笑。當校方背信棄義,欺侮學生;學生唯有群起抗議,勿讓香港人嘅大學,淪為統戰語言、謀取政治利益嘅賊竇!

0 0 vote
Article Rating