錢大康自加年薪至七百二十萬!

【肥校長、窮學生】浸大排名雖然落後五大,但 #錢大康 上任後立馬加自己人工超過兩百萬,至今已達七百二十萬,令浸大終於有項排名——即校長年薪——可以傲視全港!

山神調查浸大年度財務報告,發現2015年時校長薪俸為「$3,900,001 – 5,200,000」,即前任校長陳新滋人工。但佢當權兩年以來,年年都加自己起碼一百萬人工,至2016年加百萬至為「$5,850,001 – 6,000,000」,到2017年急升到「$7,200,001 – 7,350,000」,即至少七百二十萬*,升幅全港第一!

浸大對校長闊佬,對基層員工就相當刻薄。今年暑期就鬧出「保安、清潔工遣散費事件」,當中清潔保安公司欠款亦約百萬,但校長人工就照加,基層員工被剝削,錢校長有否出過半句聲?據調查顯示,浸大喺八大最多學生來自低收入家庭,但校長就淨係顧住自己荷包肥唔肥,惻隱之心何在?何以為人?

所謂「發財立品」,錢就發,品呢?薪金排名節節上升同時,浸大排名就節節下跌,甚至審都懶得審,條例都懶得睇清楚,就判兩位要求改善校政嘅學生停學。牛津、劍橋校長都係二、三百萬港紙年薪,錢大康將浸大越搞越衰,有乜理由人工就「步步高升」,而唔係「校長年薪國際化」?真荒謬,點解唔留返幾百萬畀學校請返啲真係有水平嘅好老師?

*薪金以浸大年度報告最高薪酬者估算

顯示較少內容
0 0 votes
Article Rating