日本遊戲嘅大陸版疑因角色名個「翠」字疑因拆字可解作習近平死兩次（习习卒）而被改用羅馬拼音取替，消息旋即傳遍兩岸四地，成為中文界最新笑話。由香港研發，喺台灣大受歡迎嘅遊戲《神魔之塔》就喺Facebook出咗幅圖，將遊戲所有角色個「翠」字嘅全部油黑，帖文一出唔夠一個鐘已經獲得二千人響應恥笑。

圖中所見，被油黑嘅角色名都係以「翡翠」開頭，例如「翡翠史萊姆」、「翡翠狙擊手」、「翡翠的蛋」。有網民笑言遊戲公司做得唔夠，其實唔單止「翠」字，個「翡」字都要禁埋，因為拆出嚟會變咗「非习（習）」。

習近平個「習」姓喺簡體字係「习」，喺中国監控嘅眼中原來成為咗好多忌諱。繼近日有標語要「陋习（陋習）」寫成「陋刃」之後，中国再獻新猷，日本手機遊戲原本有個角色叫高峯翠，都要改做羅馬拼音，寫成高峯Midori。