大陸合併千億中資機構成「紫荊文化集團」 黨委書記指揮 推動「香港人心回歸」(附獨立書店地圖)

北京政府一直有意喺香港組建「文化央企」,提升中央喺香港嘅「軟實力」,近日就有新消息。個名卒之定落嚟,叫做「紫荊文化集團」,董事長係黨委書記毛超峰,總經理就係前中聯辦秘書長文宏武。

毛超峰係海南省前副省長,最近全國人大會議就調咗做廣東代表。本身佢係氣象學院畢業,做民航河南省管理局,但做下做下就變咗海南副省長。

文宏武喺2008年起就做聯合物流(三中商)嘅董事長,2018年轉咗做中聯辦秘書長,而家喺中聯辦「大換血」之後,又返去佢呢個幫香港「文化換血」嘅位。

近年聯合出版先承認佢哋係屬國有資產,並由中聯辦管理。呢次就合併晒《紫荊》雜誌社、銀都機構及中華文化城等中資機構,有分析指咁樣包辦過千億港元嘅出版、印刷、新聞、新媒體、影視、文藝演出都,係準備「俾更高層管理」,提升中央對香港嘅文化控制。

聯合出版(集團)旗下有三聯書店、中華書局和商務印書館(三中商)、萬里機構、新雅文化等多家知名出版機構,出版圖書佔香港每年中文圖書出版量1/5;並有香港特區護照承印權同埋好多物業等。

中聯辦一直被指以「三中商」之手,以政治意識去限制書籍流通。文化人就鼓勵香港市民支持獨立書店,從而支持香港嘅多元文化。


附:《立場新聞》香港獨立書店地圖