今朝有深水埗街坊會嘅街坊發現當區南昌街休憩處近大南街冒現咗好多大型人像,由於佢哋四四方方,面色粉紅,好多街坊都驚訝點解出現咗咁多「紙紮公仔」。港語學記者馬上到現場直擊,發現呢啲人像都係「ddHK設計香港地」嘅搞作,即係上次喺通州街公園搞「數碼龐克號」Cyberpunk 展覽嗰班人。

據ddHK嘅官方網站介紹,呢個活動叫做「深水埗人_人」為主題,喺深水埗四個公共空間同社區唔同種族文化背景嘅組織,製作在地嘅裝置,喺今年2-3月快閃出現。呢一系列嘅人像,就係視覺藝術家Rex Koo嘅平面幾何半像《Simple People》,今次就將平面變成真人大小嘅立體,例如已故嘅國際武打巨星李小龍、創作人黃霑。

LCX x Simple People (Simple Evolution)Rex Koo 個人作品展| 港生活- 尋找香港好去處
Rex Koo話過《Simple people》代表佢鍾意簡單嘅價值觀,亦都代表佢同香港之間嘅關係,喺有限嘅空間內去生存同創作,「喺一個 grid 內化繁為簡」。

不過睇返街坊留言,好多人一望就覺得呢啲人像好似大隻咗嘅紙紮品:「紙紮公仔咁嘅樣,嚇死人咩!」又有人質疑袋咗政府千萬資助「唔整冇謂野,點可以穿櫃桶分餅仔呀!」都有街坊評論今次嘅裝置大不如前:「之前深水埗搞cyberpunk展都已經搞笑,但話晒人地有個場地設計,今次搞乜,同啲環境格格不入。」

上次「數碼龐克號」展覽都引起咗好大嘅爭議,質疑政府趕走通州街天橋底露宿者後,舉行藝術展覽為政府粉飾太平。但ddHK似乎都冇理到呢啲爭議,今次都選址喺較多露宿者聚集嘅南昌街休憩處。

「設計香港地ddHK」由香港設計中心策劃。香港設計中心係香港特別行政區政府嘅「策略伙伴」,喺公帑資助下積極推廣設計,致力營運及拓展香港嘅設計旗艦活動。記者翻查資料,未能搵到「深水埗人_人」獲政府公帑資助嘅金額。

深水埗區議員李文浩接受港語學訪問,直指作品離地,相關嘅展品唔適宜擺喺深水埗貧民區,附近區域充滿「道友」、毒品同犯罪問題。佢坦言同極權暴政合作下嘅藝術項目,都好難產生出好嘅作品,因為一切都會變咗粉飾太平嘅工具。

5 1 vote
Article Rating

港語學

                           

作者介紹

訂閱
提示
guest
0 Comments
Inline Feedbacks
View all comments