紫荊黨主席承認唔識廣東話 但稱「我不認為會妨礙我服務香港」

紫荊黨一直都俾本地嘅建制派質疑唔識廣東話、空降香港。紫荊黨創黨主席、全國政協委員李山喺香港電台訪問話,同其他建制派政黨目標一致,係「同路軍」,不過都會爭取參與立法會、特首選委會選舉同埋各樣政治架構。回應唔識廣東話嘅質疑,佢話會無妨佢服務香港。

佢揚言:「如果說普通話的人都不接受,這樣不會是國際化的大都市。」不過佢話都會由而家開始學廣東話,以便同香港人交流。

身為全國人大政協嘅李山,而家都去咗北京開「兩會」。佢話眼見「反修例風波演變成暴亂」,所以先同志同道合嘅朋友成立愛國愛港嘅政黨,共有13名創黨成員。佢話雖然佢哋大部分都係去過海外留學,但唔係所謂「新港人黨」、「海歸黨」,強調都係為香港服務。被問到李山本人會否參與下屆立法會,李山話「一切皆有可能」,但現時會打紫荊黨嘅基礎,參選立法會唔係重點考慮。

「香港紫荊黨」喺上年底蒲頭,成員曾經撰文不滿建制派喺區議會選舉中大敗,揚言要團結「包括約二百萬新移民中的愛國愛港人士」。不過,建制派中人就唔多服氣,質疑佢哋本身都唔係香港人,有乜資格「空降」政壇:「嚟咗香港咁多年都唔學廣東話,學乜人從政啊?唔好話市民唔妥,我哋建制派都唔服啦!」