我雖然讀中醫學及生物醫學，但至今都未有機會去醫院實習，所以都係留喺香港做下文字打雜。不過研究漢醫文化本身都係我嘅興趣，呢排我就研究緊一樣冇牌照都做得嘅嘢，就係煲涼茶喇。
我用咗啲時間觀察涼茶舖係點樣賣涼茶，簡單嚟講就係兩種，一種就係碗裝、一種就係支裝。碗裝就係大概十蚊一碗，即場喺個壺煲出嚟飲；支裝又稱樽仔涼茶，就係將啲涼茶入喺樽仔入邊雪住，方便啲客拎返屋企、公司慢慢飲。
到底呢啲樽裝涼茶可以保存幾耐？我「母校」浸大開嘅診所做過實驗，中藥煲完真空包裝嘅話，擺喺雪櫃二十日基本上含菌量都唔會超標。原因係煲一劑中藥起碼都半個鐘頭。根據世衛指引，煲水1分鐘高過65°C嘅話都可以殺滅大部分嘅細菌同病毒。滾成半個鐘，基本上乜菌都死。煲完即刻包裝嘅話，細菌、病毒都唔會係咩問題。
近年香港都引入中藥嘅真空包裝，方便唔識或唔能夠煲藥嘅病人。（網絡圖片）
但咁唔代表中藥煎劑可以擺一萬年，因為就算冇菌，中藥都會水解同埋變質，會對藥效好有影響。一般研究都話呢啲真空包嘅煎劑擺兩個星期就好，擺得耐仲有塑化劑喺包裝袋釋出嘅問題。不過目前就呢啲方面嘅研究數據都好缺乏，起碼有實驗證明會有DEHP釋出，雖然含量唔高，但久而久之都擔心影響孕婦同小朋友。
而且你又唔知佢擺咗喺舖有幾耐。總結嚟講，我估計樽仔涼茶最好買返屋企要馬上雪，同埋一個星期內好飲晒佢。
明火煲藥定電子藥煲好？
好視乎你係邊種需要。《蘋果》引述中醫師關之義話「明火可自行操控火候，以免藥材遭煲燶或未夠熟透」。
我成日唔記得睇火，所以用開電子藥煲，但清潔起上嚟都好麻煩。（網絡圖片）
我覺得係有啲奇怪嘅。以我成日煲藥嚟講，電子藥煲先係永遠唔會煲濃，因為總可以設定煲到一碗水就響鬧同埋停止加熱；但「明火」就要睇火。好似我咁落完藥校好火就去打機嘅人，就煲燶晒屋企啲煲底。而且煲藥又唔係講求鑊氣，講火力穩定、受熱均勻，點講都係電子藥煲好。
我老師就補充一點，就係電子藥煲好難洗。的確佢嘅形狀加上發熱器好易藏污納垢，相反傳統瓦煲就一眼睇晒，又可以鮑魚刷刮。
但暫時嚟講電子藥煲喺「穩定性」都係處明火。咁明火喺科學上有咩好處呢？好多嘢都有待研究，我暫時只係諗到一個幾重要嘅位。
我以前學做實驗嘅時候，學到本生燈嘅明火都有殺菌嘅作用。種菌嘅時候，為咗避免空氣同環境嘅細菌干擾，都會先開本生燈創造一個無菌區域（aseptic area）。首先近火焰之處都會殺菌，然後盞燈附近嘅空氣都會因為對流作用（convection）而殺菌（如圖所示）。
我諗，如果明火煮食或者煮藥嘅話，啲嘢食藥物其實或多或少都受益於呢個對流殺菌嘅作用。但真正嘅效果如何，又真係有待研究。