杜琪峯以廣東話歇後語「橡皮蝨乸」自喻 曾以同語稱讚「黃秋生」 到底係咩意思?

本港資深電影導演杜琪峯接受港台《鏗鏘說》訪談甚為矚目。蘇玉華問到:「有冇驚而家個創作自由或者言論自由收窄?」杜sir坦言話「冇」,更加形容自己係「橡皮蝨乸」,唔會怕無形界線。

杜sir話,「(無形界線)必然會有,必然會出現。你唔使諗,佢實會出現,一舖比一舖你令覺得更大挑戰」。但佢形容「我哋呢種創作人」係「正一橡皮蝨乸——撳極唔死」。因為創作可以好靈活,「你話呢樣唔講得,我就講嗰樣,我講嗰樣唔代表哩樣唔喺入邊。問題在於裡面嘅內容係咪你真係要講,定還是人哋要你講嘅。」

佢又話,覺得做創作、電影,唔需要去挑戰任何嘢。「唔通拍兩公婆嗌交都唔准咩?情侶又唔准咩?呢個世界冇情侶嘅?唔會啩!」佢鼓勵年輕人一定要繼續落去做,「只有當你唔做嘅時候,你先係投降。」

俾大陸封殺嘅影帝黃秋生都俾杜sir話過係「橡皮蝨乸」,秋生都喺訪談講過,覺得形容得好貼切。

佢就話:「我嘅生命都幾戲劇性,高高低低,杜琪峯話我係橡皮蝨乸,拍極唔死,王晶都話過我係不倒翁。我都覺得自己好似係打極唔死,生命力很頑強。」

不過黃秋生就用「仙人掌」自喻。「如果我係一棵仙人掌呢?仙人掌係要喺沙漠生長嘅,如果擺喺後花園佢呱咗喇。」以此勉勵自己或許適合更困難嘅環境。

港語學喺舊報紙、歇後語都搵唔到「橡皮蝨乸」呢個講法,唔知係咪杜sir自創嘅呢?無論如何,呢個真係一個好適合今時今日嘅香港人,好應該記錄嘅歇後語。

0 0 vote
Article Rating