美國詩人戈曼（Amanda Gorman）
美國青年詩人戈曼（Amanda Gorman）喺拜登朗讀詩作，一躍成名，世界各地都要翻譯佢嘅作品。但係加泰羅尼亞嘅翻譯作家域陀·奧比奧斯（Victor Obiols）就話，本來出版社應承咗畀佢做翻譯，但人哋就話佢知因為佢冇非裔血統，又唔係年輕女性，佢嘅翻譯工作就要取消。
域陀接受法新社訪問嗰時講：「佢哋話，我唔適合做呢次翻譯。佢哋冇質疑我嘅翻譯能力，但佢哋要搵個背景唔同嘅人，最好係女性、後生、激進主義者，最好係黑人添。」
加泰隆尼亞作家域陀（Victor Obiols）
域陀做過好多經典嘅英文譯加泰文作品，例如莎士比亞、王爾德呢啲大作。佢喺三個禮拜前收到巴塞隆拿出版商Univers嘅要求，將戈曼嘅詩譯做加泰文。佢做完之後，出版社就收到一個訊息，指責佢係唔適合嘅人。域陀唔肯定係嚟自原本嘅發行商定係戈曼嘅經理人。
身為巴塞隆拿居民嘅域陀話：「呢個問題好複雜，好難三言兩語講得清。但係，如果因為詩人係21歲嘅美國人，我就譯唔到佢嘅詩嘅話，不如話我唔係公元前八世紀嘅希臘人，所以譯唔到荷馬；或者唔係16世紀嘅英國人，所以譯唔到莎士比亞。」
出版社Univers就冇回應。域陀就話，即使係咁，出版社都應承會為佢嘅翻譯作品畀錢。
無獨有偶，2020年布克國際獎得主、29歲荷蘭作家盧卡斯（Marieke Lucas）早前都獲邀將戈曼詩作譯成荷蘭語，惹來批評。有人質疑盧卡斯係白人，又冇相關經驗，盧卡斯就退出唔做呢單翻譯喇。
荷蘭作家盧卡斯（Marieke Lucas）
不過，盧卡斯用荷蘭文就寫咗首詩「乜都可以居住」（Everything Inhabitable）回應對佢嘅批評，亦都被翻譯做多種語言登喺報紙。