管浩鳴:冀政府復活節前放寬限聚令 會減少讀經配合抗疫

復活節將至,但受限聚令影響,而家教會都仲未畀聚會。基督教協進會收到民政事務局口頭通知,話疫情受控會放寬宗教聚會,場地限坐三成滿,條件係教友用「安心出行」或登記資料。聖公會教省秘書長管浩鳴牧師話,如果獲放寬限制,將會減少讀經、唱詩,以縮短崇拜時間。

聖公會教省秘書長管浩鳴牧師話,復活節係基督教大節,希望政府從寬,以舉辦實體崇拜。佢話聖公會會規定教堂打開部分窗通風,教友填寫當日座號資料,以便追蹤;個別教堂可自行決定係咪要預約內進,避免人數過多在外等候。

佢又透露,崇拜會減少讀一段經課,又會揀啲短啲嘅詩歌嚟唱,每節崇拜約1小時,較以往短15分鐘,以騰出時間消毒教堂;教堂會鼓勵教友睇網上版經課,現埸亦會提供相關經課紙本,用完即棄,避免交叉感染。

0 0 votes
Article Rating