朱凱迪入獄前學定越南話 獄中教囚友廣東話 囑太太送粵越雙語詞典作教材

47 名民主派初選參選人被控違反《國安法》串謀顛覆政權罪,其中36 人包括朱凱廸分別還柙喺赤柱監獄及荔枝角收押所候審。朱凱廸太太區佩芬今日(5)到赤柱監獄探望丈夫,朱凱廸正在獄內學習同越南囚友互相學習越南話同廣東話。另外,朱凱廸右眼有退化情況,現正接受治療。

區佩芬接受《立場新聞》訪問時透露,朱凱廸特登還押前一個月開始用免費手機應用程式學習越南文,「半夜三更起身都睇到佢係度學(越南文)…….」,因為佢話獄中會有不少越南人,準備同越南人傾計。最終朱凱迪喺獄內認識咗一位越南籍嘅囚友,可以互相教對方講廣東話同越南話。

還押1個月至今,區佩芬為朱凱廸帶入越南語課本及粵越雙語字典。朱凱廸表示雙語字典對越南籍嘅囚友非常有用,叫太太區佩芬送一本予囚友,又話囚友建議佢寫信畀囚友喺越南、7歲大嘅仔,睇下阿仔睇唔睇得明。越南籍囚囚友就話朱凱廸好叻,學得好快。

另外,區佩芬表示,朱凱廸在還押前約 2 個月開始,右眼有不適,直至入獄時病情加重「好似有一下下閃光咁,睇嘢唔清楚」。經安排外出檢查後,醫生表示朱凱迪嘅眼球水晶體老化,並未有大礙,只須滴眼藥水及每月按時檢查便可。不過,區佩芬表示,朱凱廸現時依然覺得右眼眼頭位置「睇唔到一小塊」,會喺下月覆診時再向醫生查詢。

0 0 votes
Article Rating