加國港人發起人口普查填「Hongkonger香港人」「Cantonese廣東話」 爭取當地政府認同港人身分

有加拿大港人發起「#IAmHongKonger」行動,呼籲當地港人喺今年5月回應加國人口普查嗰時,種族一欄填上「Hong Konger(香港人)」,推動政府認同香港人身份。發起人Crispin Chow指,加拿大喺上次人口普查雖然都有寫當地有215,775名香港出世嘅加拿大居民,官方數據冇顯示同承認「香港人」嘅種族身份,希望爭取當局認同,為港人群體提供適當服務。

Crispin話:「香港人有獨有嘅文化,講獨有嘅語言,我哋想加拿大知道我哋存在……我認為我嘅種族身份及文化正受到威脅,會慢慢逝去。」

佢鼓勵加國港人喺填寫「Hong Konger(香港人)」做種族身份,寫「Cantonese(廣東話)」為母語。

加拿大人口普查將喺今年5月舉行,四分之一嘅居民會收到長問卷,其他居民會收到短問卷。短格問卷只係會問基本個人資料,包括年齡、性別以及家中常用語言。長問卷就會問埋出生地、種族同文化淵源。