據獨立媒體報道，有個大學生喺遮打花園嘅示威集會附近被捕，被搜出螺絲批。法庭上，被控管有適合作非法用途工具罪嘅被告話因為阿媽風濕痛發作，認為即將落雨，所以帶備雨遮，俾法官質疑講法毫無科學根據，仲話「難以相信修讀計算機工程嘅佢，會認同無科學根據的說法」，將呢個講法講到做被告供詞嘅一大漏洞咁。到底落雨之前風濕痛係咪真係法官所講咁無稽呢？

風濕痛嘅講法喺中醫經典已經出現，《傷寒論》寫話：「風濕相搏，骨節煩疼，掣痛，不得屈伸，近之則痛劇……惡風不欲去衣」即係話患者會關節疼痛，屈伸不利，而且患部會怕風。因為成因係同風邪、濕邪有關，就叫做風濕痛。報道中嘅被告係讀電腦工程，又唔係讀自然科學，會相信中國嘅一啲傳統觀念有幾出奇？

而且落雨會風濕痛呢樣嘢都唔見得有幾唔科學。「冇科學根據」意思係無人做研究，事實上簡單查下，都會發覺研究風濕痛同天氣關係嘅外國研究都不在少數，其實都係一個全世界都有興趣嘅課題。而且，基本上唔同研究同承認風濕痛同雨天或多或少都有關係。

2014年就有篇《自覺天氣感知與老人骨關節炎關節痛在歐洲六國的研究》[1]，佢哋統計咗2942老人患者嘅資料，發覺多數患者都感覺到天氣係會影響到佢哋關節痛，其中女性同比較焦慮嘅關節痛患者更加容易感覺到天氣。2017年華盛頓大學有個研究問「雨天係咪真係會加劇關節痛？」[2]，答案係相反，似乎患者喺雨天唔會咁同，不過研究者都話原因好可能係因為落雨患者連活動都減少咗，所以先無咁多。無論如何，患有風濕痛嘅人，天氣係好影響佢哋嘅生活。

我嘅長輩，或者踢波有舊患嘅朋友，落雨之前都會有種陰陰痛嘅感覺。我自己雖然冇風濕痛，但就有「風濕鼻」，翻風落雨前就會鼻塞好辛苦，準到好似天文台咁。呢啲經驗好多人都有，但法官好好彩，自己同身邊嘅人又冇風濕鼻，又冇風濕痛，但點解可以凌駕被告同佢媽媽嘅經驗，又可以否定已知各國研究確認嘅事實，率言「毫無科學根據」，公堂之上會唔會太武斷？點解唔搵返科學嘅專家做證？我明白成個判決仲可以有好多理由，不過就唔好借科學個名啦。

[1]Timmermans, E. J., van der Pas, S., Schaap, L. A., Sánchez-Martínez, M., Zambon, S., Peter, R., . . . Deeg, D. J. H. (2014). Self-perceived weather sensitivity and joint pain in older people with osteoarthritis in six european countries: Results from the european project on OSteoArthritis (EPOSA). BMC Musculoskeletal Disorders, 15, 66.