韓國60萬人聯署上書總統成功叫停中國文化城 斥不應割地埋葬本國歷史

韓國早前發起總統府嘅「青瓦台網」聯署,反對喺江原道興建佔地約120萬平方米嘅「中國文化城」,聯署迅速獲超過60萬市民響應。負責計劃嘅公司「Kolon Global Corporation」喺星期一(27號)決定取消項目,話即使會蒙受巨大損失,「公司明白該韓中文化城計劃,已不能再進行」。

聯署發起人喺請願書直言,唔明白點解要喺韓國起個城推廣中國文化。佢哋擔心史前擔址會被破壞,而且中國繼泡菜、韓服之後,亦會繼續侵佔韓國文化。

人民網喺舊年 12 月報道話,江原道「中國複合文化村」項目係由江原道政府、人民網、可隆國際、內外住建、大韓武術協會等共同策劃,目的係提升中國文化喺當地嘅影響力同傳播力,塑造文化繁榮、相容並包嘅中國國際形象。

江原道知事崔文洵早前一直堅持話,方案係私人企業投資嘅旅遊建設項目,唔係要俾讓中國人聚居嘅「唐人街」,但都無法平息民憤。

江原道省2019年同人民日報簽咗協議,會喺春川市建設一個複合嘅中國文化城,規模係仁川唐人街嘅十倍大,以振興國內旅遊業。

#韓國文化 #中國文化 #泡菜 #韓服 #廣東話 #港語學