大馬女神林明禎最近喺香港出演女主角嘅《一秒拳王》大獲好評，不過美中不足之處，就係佢喺戲中依然冇辦法用廣東話講對白，於是用到國語。佢噚晚喺社交平台貼出一份新劇本，用「兩文三語」宣告：「現在起，請只跟我說廣東話，淨係同我講廣東話，唔該！Only Cantonese from now on thx」

林明禎籍貫廣東潮州，係馬來西亞歌手及演員，喺柔佛長大。佢為咗拍港產片呢幾年一直都苦練廣東話，但始終講唔正，所以有啲戲會見佢講廣東話，有啲戲會全國語。

雖然係咁，佢都好比心機去學。佢幾年前接受傳媒訪問已經話：「如果我要學多啲廣東話，我要一個講廣東話嘅男朋友，想快啲學，有沒有介紹？」