陰莖專用間尺出錯「芝士腸」變「牙籤仔」 港語學聲明道歉

對唔住,我哋把間尺整錯咗,令成個批次出現問題,出貨要延誤,令大家又要等候。

因為牙籤仔間尺反應遠超預期,我哋太心急希望喺今日可以出貨畀預購嘅大家,因此搵咗本地廠商喺母親節夜晚趕工,但期間我哋「快刀手就切損手」,將錯誤嘅圖檔畀咗廠商,導致成批間尺刻度出現問題。雖然喺出貨即日已發現錯誤,但已經生產咗220把。好彩嘅係,絕大部分嘅錯版間尺都未批發畀店舖,只係經本會渠道購買,我哋可以盡力補救。

雖然間尺本身都係可以抽下水,但都具有實質功能,係可以量度男士性器官嘅尺寸,茲事體大,更加唔應該出錯。舉例講,呢次刻度錯誤,將會導致原本有18CM嘅人「連登標準」錯誤以為自己唔夠長,或者令「芝士腸」以為自己係「牙籤仔」,而可能成為實際嘅社交問題以至尊嚴受損。我哋為因為呢個錯誤受影響嘅人致歉。

我哋會盡力補救今次錯誤:我哋唔想浪費廠商一番心血,亦都想減少今次損失,因此生產咗嘅錯版間尺將會喺註明係錯版之下,喺 椰子士多 以錯版工場價 $20 出售(原價$60)。而所有循港語學網站、社交平台訂購間尺嘅朋友呢個批次嘅問題,而買咗錯版嘅朋友可以選擇差價退款($40)或者以錯版退換更正版。我哋會同呢班朋友詳細跟進。

至於原定喺聽日交收嘅朋友同店舖,抱歉未能如期出貨,我哋會再同大家協商出貨時間。喺呢度感謝 ODA Studio 嘅朋友同廠商捱義氣趕工,以及椰子士多嘅配合,我哋會盡力喺後日(12/5)恢復供應,並且會痛定思痛,以後製造前會控制好啲質量,務求將平靚正嘅本地製造產品帶畀大家。

椰子士多
地址:旺角信和中心M層M37號舖
營業時間:星期一至日2:00PM-10:00PM

#牙籤仔間尺 #廣東話 #港語學