律師稱要求警員翻譯廣東話不果反被打傷 更以「涉誤導警務人員」拘捕

一名巴基斯坦籍律師陪同被捕人士到尖沙嘴警署後,離開警署時稱突然被要求留低警署,佢要求廣東話翻譯解釋,但就俾警員用粗口怒鬧「x你老母」,被趕出警署並擊打背部。佢事後向警方投訴,反被投訴警察課指佢提供虛假資料,誤導調查人員,至今日(25號)以「涉嫌誤導警務人員」拘捕。

事發喺去年11月24日,巴基斯坦籍律師C(化名)喺尖沙嘴警署陪一名被捕人士錄口供,被捕人士不適送院。C離開警署時,佢話有一名女警要求返回房間等候,之後一名男警員忽然走近並以廣東話呼喝。由於C唔識廣東話,佢要求警方傳譯員繙譯,並且問點解該警員好似好無禮貌。傳譯員解釋警員只係聲量較大。但警員再上前以廣東話爆粗大罵,C只係聽得明「X你老母」。其後警員上前圍住並威脅話會拉佢。

C仲話,警員講過「可以用襲警或任何理由 (for any reasons they want)」拉佢,又話有7至8名便衣警圍住佢,之後有3名警員逼佢離開現場,其中兩人捉實佢對手、又有一個拑住條頸,「好似押犯咁」,離開電梯期間,更感到有人擊打佢背部。佢被鬆開後,背部、手臂感痛楚,隨即到報案室投訴,並要求警員拍下其傷勢。佢當時其手臂有紅印、手肘輕微擦傷,其後被送往伊利沙伯醫院驗傷,獲批3日病假。

C多次要求提供相關警員嘅姓名,但俾警方拒,最終只能在投訴表格上「被投訴警員」一欄填上代表性別嘅M同F。投訴警察課接手調查,話冇相關警員資料就好難追查,又話警署內除咗報案室同值日官辦公室外,其他地方都冇裝閉路電視。C話對投訴警察課冇信心,唔信佢話「冇閉路電視」,強調會用所有可行方式追究到底,唔排除提出私人檢控。

最終警方話向律政司索取意見後,今日就拘捕C,話佢涉嫌誤導警務人員。案件交由投訴警察課九龍第二隊跟進。

#種族平等 #歧視 #廣東話 #警察暴力 #警暴 #投訴警察 #巴基斯坦 #尖沙咀警署 #港語學