新加坡漢廣東話爆粗提人飲茶紅遍大陸 「做碌_呀做 老細唔錫你㗎」

新加坡有個貓王打扮嘅「飲茶哥」,上年3月喺Facebook拍片無厘頭粗聲粗氣提人放break飲茶,「做碌_呀做 老細唔錫你㗎」,形象滑稽,紅遍網絡。到咗今個月卒之傳到去大陸,撞正大陸而家「躺平」文化嘅熱話,成為咗休閒文化嘅代表符號,仲喺大陸激發咗好多嘅二次創作。

「飲茶哥」原名Gurdip Singh,佢接受新加坡《聯合早報》訪問時話,佢本身係旁遮普族嘅鍚克人,但因為細個喺馬來西亞好多華人鄰居都講廣東話,佢久而久之都學識咗。雖然佢呢排喺大陸咁紅,佢就話冇去過大陸,只係去過香港。佢話佢好鍾意香港,因為一講廣東話,香港人就會以為佢住喺香港好耐,表現得好接納佢。

大陸影音網站嘅創作者都爭相將「飲茶哥」嘅片段二次創作同埋整表情包。咁啱呢排大陸興起「躺平」文化嘅討論,後生嘅大陸人對國內高壓力、無前途嘅工作文化好失望,認為與其跟隨社會期望堅持奮鬥,不如選擇「躺平」(瞓喺到)處事。不過,呢種態度俾官方嚴詞斥責。南方日報刊登文章《「躺平」可恥,哪來的正義感?》,認為呢種語言敗壞中國人積極工作嘅風氣,呢篇文都俾官媒新華社轉載推薦。

奶茶文化喺東南亞地區相當流行,無論新加坡馬來西亞、泰國、香港定台灣都有自己風味嘅奶茶。呢種飲品源自英國,而飲茶哥所講三點鐘要飲茶嘅訊息,正正就係香港人好熟悉嘅英國下午茶文化。

#飲茶哥 #新加坡 #奶茶聯盟 #下午茶 #放break #躺平 #廣東話 #廣東話粗口 #爆粗 #大陸網絡 #港語學

5 1 vote
Article Rating