鍾翰林因反普教中被關押逾200日 分析指或違國安公署「放生廣東話」方針

鍾翰林舊年10月27號被捕,被控違反國安法同洗黑錢,先前申請保釋被拒,至今已被拘禁超過200日。律政司以鍾翰林曾發表反對普教中等言論為由,反對佢嘅保釋申請,到今日(1號)庭上法庭決定繼續將鍾翰林還押,案件將會喺8月16日審前覆核。分析指,律政司將鍾「反對普教中」嘅言論都當做罪行,或違反國安公署近期「放生廣東話」方針,預料控方都係採取緊大包圍羅織罪行嘅策略,測試法庭。

案件今日喺區域法院由胡雅文法官審理。20歲被告鍾翰林被控一項分裂國家罪、2項洗黑錢罪同一項串謀發布煽動性刊物罪。案件已排期喺11月2號,進行為其7日的中文審訊,8月16日做審前覆核。3月鍾翰林上庭申請保釋嗰陣,控方指鍾翰林上年喺社交網站反對普通話教中文(普教中)等言論,係分裂國家嘅具體行為。法官同意繼續還押。

有法律界知情人士指,將「反對普教中」嘅言論當做罪行並非國安公署嘅方針,因為國安公署署長鄭雁雄喺之後嘅4月15號「國家安全日」特登強調,香港人本身「講廣東話、寫中國字」「係有濃濃嘅中國情結」,顯然放風要「放生廣東話」,而且「推行普教中」都唔係林鄭政府當務之急。但係律政司依然將鍾「反對普教中」嘅言論擺入控罪,係用大包圍嘅方式測試法庭對《國安法》嘅理解。

知情人士估計「反對普教中」唔會係控罪重點,「佢都係試下每個facebook post都拎嚟講,睇下有邊個位有機會『入到』」,呼籲大家關注國安法案件嘅發展。

0 0 vote
Article Rating