做過語常會主席、推動過「普教中」嘅田北辰，認為本港多年推動普通話成效有限嘅原因係唔使考公開試。

田北辰話：「普通話其實不考就冇人讀，因為社會上冇呢個語境。所以我認為係時候開始思考，唔使即刻嘅，可能幾年後，要有時間表，文憑試中文科撥出很小百分比（考普通話），我就建議百分之十。」

關注香港語言文化問題嘅港語學主席陳樂行就質疑，點解大陸高考都唔使考普通話，香港都要做到咁「chur」。

陳樂行話：「香港嘅普通話教育其實已經全國數一數二。大陸只係小學要讀普通話，香港就幼稚園讀到中三，由拼音到詞彙，其實乜都學晒，讀到中六公開試，其實只係追求香港人人北京口音，但對於同大陸人溝通到唔到影響唔大。」

佢指出，今年全國嘅普通話普及率只係啱啱好80％，但香港新一代識聽識講普通話已經達95%以上，根本無需要再推普。「而家啲學生學咗九年基本功，實際真係會用嘅人，同大陸人傾多啲計其實已經滾瓜爛熟啦，根本都唔需要再谷。」

陳樂行力主保留DSE廣東話口試，佢指田北辰咁建議加入普通話口試，根本係同考評局簡化文憑試嘅政策倒行逆施。「又話想比多啲時間搞國安教育，先殺通識、簡化中文嘅，咁你而家想點先？」質疑此舉係催谷學校實行普通話教中文，令到本地普通話教學集團得益。

至於國家教育部提出香港要喺法律上明確普通話同簡體字地位，田北辰認為，普通話及簡體字已有法律地位；又認為繁體字係不可取代，俾學生認識下相應嘅簡體字就得，唔需要考核。