廣州疫情下 香港中醫實習學生嘅苦況

大陸武漢肺炎疫情又爆發,廣東省新冠肺炎防控指揮辦今(6日)宣佈,將越秀區、海珠區、昌崗街和濱江街由低風險地區調整為中風險地區。香港唔少院校都會派出學生到當地中醫院實習。據我哋向當地嘅中醫學生了解,由於廣東省中醫院護士都確診肺炎,同學嘅中醫實習都要暫停,而且同學需要用健康碼做病毒測試,出入都頗為困擾。

同學表示,中醫院嘅門診暫停,住院部唔洗出入,六月嘅進修醫生全部都提早離去,唔洗再留喺中醫院,而香港學生都暫停咗實習。同學需要不停做核酸測試,一個星期都做兩三次。「健康碼成日無啦啦就黃(由安全變成「待核實中高風險人員」),一黃又要去做檢查,on99」。而健康碼黃就連屋企都返唔到,地鐵又搭唔到,要諗辦法走去做核酸測試,對生活頗為困擾。

問到香港學生有冇打疫苗,同學表示冇得打。「依加疫苗唔係俾平民打,全部都留俾前線打,而且打國藥同科興。我哋就唔想打,但佢一定要我哋打都無辦法。」

佢仲話醫院都俾突然封區殺個措手不及。「一封區就無得出門口。所以上個禮拜啲醫生已經開定一個月藥畀病人,點知星期五就封院。」佢哋又話廣州市面上無乜特別,但封鎖區就冇乜消息。因為而家只有微信上唔知真假嘅cap圖。而官方消息只係一味歌頌啲疫苗接種率好高、醫護好辛苦、好偉大咁。

佢又話,居民都對疫情有點擔心,特別驚自己住嗰度會突然封區,所以多咗人儲糧,好多人買幾袋米返屋企。

我哋會同廣州嘅同學保持聯絡,有進一步消息會同大家跟進。

5 2 votes
Article Rating