編者絮語:唯真為善——唔好用假嘅嘢推廣廣東話

【編者絮語】今日有個「撐廣東話page」都有報iOS 15,寫到似層層咁話「apple玩大家」,因為apple齋出普通話拼音輸入廣東話詞彙,唔肯做粵拼打字。文末個page就share自己錄嘅廣東話教學片「幫下大家」。
.
冇粵拼輸入法係幾sad,但我哋睇返apple原本個公布,發現件事完全唔係佢口中「玩大家」嗰回事——apple幫香港人加入咗三本詞典,然後再特登加入完全用廣東話控制電腦嘅Voice Control。一來詞典幫到好多人學廣東話同埋保存香港文化,而全語音控制電腦根本係近未來科技,而家都只係支援五種語言,apple都擺埋廣東話落去,咁大件事點可以唔講?
.
「冇人講咪我講囉。」我講,我乜都講,我連嗰個page普拼打廣東話個故仔都打埋落去。我明呢位仁兄係靠廣東話拼音開飯,但有冇必要淨係講衰嘢踩低人哋抬高自己,為咗宣傳自己套粵拼教學就作到人哋十惡不赦。
.
我搞page個理念同好多人唔同。有啲人好「後現代」,覺得搞page就係呃like、寫多啲搞笑嘢,唔使理件事本身係點。但我喺bu行過「唯真為善」塊牌匾行得多,我會盡量搵多啲facts,寫多啲參考連結同資料,等讀者去全面啲了解件事。
.
上年差唔多時間,呢位仁兄批評港語學報道「中聯辦話全粵語書寫係別有用心」係「危言聳聽」係「呃like」,呼籲大家unfollow港語學。但事實係中聯辦的確喺佢個blog咁講,而我認為寫廣東話文學嘅人一定要知道呢樣嘢,冇得唔擺落去。而家邊個喺到危言聳聽呃like,其實睇多啲資料就會知道。
.
所有報道之前都應該搵多啲資料,係真嘅嘢就盡量寫出嚟,唔係應該係咁咩。我明有啲人係要靠廣東話拼音開飯,但搵食真係唔係得呃like/作故仔/標奇立異呢啲路線。我希望,我亦都相信,守護廣東話呢條路,係喺真相嘅道路上面行出嚟。希望大家都可以恪守呢條路。
.
港語文集總編輯
陳樂行
0 0 vote
Article Rating