楊潤雄:國家教育部冇建議用普通話教書 屬長遠議題需仔細考慮

自從日前中國教育部出咗建議話加強香港普通話教育之後,政界同商界都有啲人走出來話香港要用普通話教書。噚日(10號)教育局局長楊潤雄話,香港而家一直都有普通話課程,又指中國教育部冇建議用普通話教書,係長遠議題,需要仔細考慮。

楊潤雄話:「喺而家嘅教育裡面,普通話嘅學習其實都係課程嘅一部分,呢方面會繼續去做。而簡體字一路以來,我哋都鼓勵學生學咗繁體字後,都能夠認識簡體字。我相信大灣區發展會令我哋同大灣區城市交接,同日常溝通越來越多,所以充分掌握普通話及簡體字,對學生未來發展百利而無一害。」

港語學主席陳樂行分析指,香港現時嘅普通話教育實質已經相當足夠,再改課程都真係唔會達到更大效果,只會令老師有更大負擔。「而且人哋都講明中國教育部未去到咁盡,都希望香港啲『愛國人士』唔好吹到過晒火,以免引起各界太大反感。」

近日語常會主席田北辰、恒隆集團主席陳啟宗都喺公開場合表忠,話香港下一代要學普通話、中學文憑試要考普通話,引來大眾嘩然,市民為香港走上推普滅粵之路深感不安。

#教育部 #香港 #教育局 #簡體字 #普通話 #正體字 #大灣區 #普通話教育 #楊潤雄 #陳樂行