曾帶頭停用普教中 德信學校校長被指「未能履職」突然休假

天主教男校德信學校尋日(15號)突然向家長出通告指,德信學校校長郭超群「未能履行校長職務」,要即日起開始休假,令到好多家長大感錯愕。有家長表示,郭校長曾帶領學校由普通話教中文全面轉回廣東話教學,大大改善該校中文教學,唔明白點解佢會突然停職。

據德信學校校監何炳德尋日公布「署任校長安排」通告,指校長郭超群因「未能履行校長職務」,會由即日起休假。法團校董會安排咗副校長李美鶯署任校長。教育局尋日就話,已知悉學校有關安排,會同繼續與學校保持溝通,提供適切協助,確保學校運作正常。

家長就對郭校長停職大感錯愕。有家長指,校長每年都有按學校傳統舉辦六四祈禱會,但只係提到有六四事件存在,並冇點解釋事件,同埋都係按傳統帶領同學為中國學生同人民祈禱。而且郭校長曾經帶領由普教中轉返做粵教中,令家長印象深刻。好多家長都形容佢係好校長。

郭超群喺德信學校任教多年,11年任職副校長,13年就升任做校長,14年獲教聯會頒發國情教育組優秀教師獎,亦曾獲行政長官卓越教學獎(德育及公民教育)嘉許狀。學校喺89年六四事件之後都一直有做祈禱會,為死難者進行祈禱,同學生講述事件起因。
德信學校幾年前嘅二至四年班都有普通話教中文,喺2017年以問卷諮詢全校家長意見,得到九成家長支持轉回「粵教中」,之後就恢復返廣東話教學。
0 0 votes
Article Rating