全港首間中醫醫院交予浸大營運 浸大:肯定浸大在中醫藥發展領導地位!

港府幾年前提出喺將軍澳百勝角路斥資86億興建本港首間中醫醫院,並且會招標交畀非牟利機構營運。食物及衛生局噚日(23號)公布,批咗中醫院營運服務契約畀香港浸會大學。浸大對決定表示欣喜,話係「對浸大在香港中醫藥發展領導地位的肯定」。

根據公布,浸大須成立擔保有限公司嘅營運機構,管理、營運及保養中醫醫院,營運機構須按《私營醫療機構條例》要求,就營運中醫醫院申領牌照。浸大校董會主席陳鎮仁表示欣喜,話浸大喺提供中醫藥臨牀服務有豐富經驗,政府委以重任係對浸大在港中醫藥發展領導地位嘅肯定。

浸大校長衞炳江表示,香港設立首間中醫醫院將可回應市民長期以來對優質中醫醫療服務嘅殷切需求,並作為本港中醫藥臨牀教學同科學研究嘅基地,同時提升本港喺推動全球中醫藥制度化、標準化嘅角色。

浸大將盡快按照服務契約,配合政府推動中醫、中藥發展嘅政策,積極籌劃同推展與中醫醫院營運相關嘅預備工作,以確保中醫醫院喺落成啟用後能夠暢順運作,為市民提供優質醫療服務。

中醫醫院選址喺將軍澳百勝角路,佔地約4.29萬平方米,由政府出資興建,料造價86.2億元,將設400張病牀,門診預計診症量為每年31萬人次,期望於2025年第二季起分階段投入服務,並喺開院後5年提供全面服務。

浸大生物醫學系畢業生陳樂行表示,之前因為喺廣東省中醫院實習遇上恐嚇而中斷實習,最終無辦法以中醫學位畢業。希望將來香港嘅中醫院能夠提供實習嘅機會,但香港可以培養土生土長嘅中醫人材,令本地中醫藥事業更加成熟。