【蘋果日報】【李八方online】楊潤雄揀中做副局 蔡若蓮:我都估佢唔到!

更新時間 (HKT): 2017.08.09 17:23
蔡若蓮(右)話獲老公同兩個囝囝支持先加入熱廚房。蘋果日報
林鄭新風下,唔只局長要見人,副局政助都要多多同傳媒聯絡,11名已經履新嘅政治助理同副局長同傳媒茶聚,「風頭躉」當然係未上任已被要求下台嘅教育局副局長蔡若蓮,佢喺茶聚中大部分時間都被傳媒包圍,助手至少四次以「食嘢先」、「飲嘢先」等為由拉開解圍,但唔夠幾秒又再被圍,難怪其他政助話有蔡在場,自己「好安全」。

爭議聲中上場嘅蔡若蓮,期間hardsell自己過去「好貼地」,而履新後覺得自己要好努力學習,每日只能瞓約4粒鐘,比過去做校長6、7個鐘少,笑言「你睇我個樣都知啦,無乜得好瞓!」。問及未來要現身立法會有冇壓力?佢話平常心對待,「如果佢對我要求嚴格,咪等我再進步啲、做嘢再認真啲,落力啲」,透露願意接受挑戰入熱廚房,係因為老公同兩個囝囝支持;至於教育局局長楊潤雄幾時搵佢做副局?蔡話唔記得,但吐出一句:「我都估佢(楊)唔到!」

唔少傳媒問蔡若蓮攞手機號碼,佢以「家都未背得到(新手機號碼)」為由話遲啲再畀大家。對於早前一度被港語學負責人指控被佢封鎖facebook戶口,蔡解釋自己個fb戶口係私人用嚟同親友交流,「嗰啲係一啲私人交流嚟,唔係攞嚟做工作嘅」,但未來會視乎情況,考慮係咪開個新fb戶口同老師交流。

香港眾志批評佢曾協助教聯會推出洗腦國民教育教材,蔡話已經退出教聯會,唔評論教聯嘅嘢,但就自爆:「我其實都係教協會員嚟㗎」,自言88年至今一直有交會費,多年前更曾在教協報發表文章,指2000年後因為參加工聯會攝影班先加入教聯會,「我諗佢(教育界立法會議員葉建源)參加教聯早過我,我參加教協早過佢」,似乎對被標籤左派心深不忿。

佢話上任後已嘗試約見葉建源,但葉不在港,佢打過電話畀教協會長馮偉華,引述馮話要等葉返港後再算。

0 0 vote
Article Rating