喺香港地同人溝通，好多時都要用廣東話；根據政府資料，平均每100個人就有89.1人慣用廣東話，只有唔夠2人慣用普通話。近日喺校園入面，就發生離奇「禁講普通話」嘅羅生門事件；有傳上水東華三院甲寅年中學有幾個中一學生，上堂嗰陣用普通話講粗俗語言，畀老師指摘，另一版本就話，學生係喺課外時間講普通話，但畀老師警告「唔該講返廣東話，如果唔係，唔該唔好喺度讀書」。有facebook secret page出po，鬧老師譏諷同針對講普通話嘅學生。不過公審唔一定有道理，唔少校友同網民都力撐老師，話嗰間中學係英中，老師並無歧視同學，只係鼓勵同學多講廣東話，唔好喺中文科口試失手。

事緣一個無署名嘅網民，上星期六（28日）喺facebook專頁KYD Secrets出po，點名批評嗰間學校教家政嘅溫老師，同訓導主任王老師，話佢哋挖苦、譏諷同針對喺課堂外講普通話嘅中一學生：「唔該，甲寅年係一間香港學校，喺香港讀書，唔該講返廣東話，如果唔係，唔該唔好喺度讀書。」樓主認為，呢兩位老師擺明係「針對某些言語種（族）群，發表一些歧視言論」，暗示不歡迎講普通話嘅學生。樓主聲言會「連（聯）署」向辦學團體反映，同埋去教育人員專業操守議會、教育局同平機會投訴，又會「連絡」傳媒揭發呢件事，重新「打造」一個公平同自由嘅教學環境咁話。

不過，唔少網民並無盲從公審，仲好撐嗰兩位老師。有網民話，自己一出世就講廣東話，聽到啲「80%普通話溝20%廣東話」嘅新式語言，扮晒係廣東話，就覺得好「un耳」，想普通話同學尊重返廣東話，唔識可以學。亦有自稱代表該校師生嘅網民話，希望啲普通話學生可以退一步，嘗試融入學校。更有網民為老師發聲，話老師冇歧視，「只係鼓勵我哋講多啲廣東話，唔好係口試失手」。

呢個投訴po好快就成為網民熱話，短短3日就有超過700人畀嬲嬲，佔回應總數近70%。雖然個po無署名，不過睇返啲行文用字，唔似係本地人寫，例如叫「聯署」做「連署」、「聯絡」變「連絡」、「維護」寫成「打造」，而且仲有唔少白字，例如「學藉」、「什至」等。有知情人士仲留言踢爆，嗰幾個學生因為一直喺度講普通話，仲夾雜粗俗字眼，Miss Wan提醒過佢哋，但冇收斂，先至警告佢哋「唔該講返廣東話，如果唔係，唔該唔好喺度讀書」。

一直關注本港「普教中」問題嘅「港語學」召集人陳樂行就慨嘆，廣東話同普通話喺香港嘅待遇好唔同，佢話試過有抗爭者講咗個廣東話粗口字而廣受批評。佢認為，如果嗰幾個學生因為講普通話粗俗語言，不忿畀老師責罵，就喺網上點名話老師歧視佢哋，咁係惡人先告狀，小事化大去公審老師，有機會令老師教席不保。

網民點睇

（編按：截至報道出街，喺個po都未見到有留言撐學生，啲留言都係一面倒，如果你認為老師歧視佢哋，歡迎到《蘋果》網站留言。）