浸會大學學生不滿普通話豁免試評核制度，早前「佔領」語文中心，事後多名學生接獲校方通知，今個月中要面臨紀律聆訊。浸大學生Facebook專頁「浸大山神」近日發文，指協助準備聆訊過程中，發現校方指控「十足小學雞」。

面臨紀律聆訊嘅學生，除咗被勒令停學八日嘅學生會會長劉子頎同中醫學生陳樂行，據知仲包括教務議會學生代表廖偉濂，同另一位同學。由陳樂行創立嘅專頁「浸大山神」發文話，同學首宗罪係「Obstruction or disruption of learning, teaching, research or administration」，即係干擾大學教研與行政。

之不過睇返校規，控罪其實仲有下文「such as talking, eating or drinking in classrooms and using of mobile phone during lectures」。即係話，呢條規例原意係懲罰上堂傾偈、飲食或者玩電話嘅同學，山神認為用呢條規例嚟指控學生課外抗議活動，「邊度啱使呢？」

山神又批評，將呢段斷章取義嘅古老上堂規矩，變成學生首項罪名，實在匪夷所思。至於佢哋另外被指控「有不恰當行為」呢宗罪，英文係「Indecent behaviour」，其實解作「不雅行為」，一般指裸跑或者露體，顯然都唔係今次抗議學生嘅所作所為，「點解大纜都扯唔埋嘅罪孽，都放晒落同學嘅頭上？」

山神擔心學生到時會受到不公正對待，呼籲校方迷途知返，撤銷無理控罪，更希望公眾繼續關注，「唔好畀抗議同學枉死喺無厘頭嘅罪名上。」面對紀律聆訊，陳樂行講明問心無愧，劉子頎一早就講粗口致歉，強調冇威嚇教職員。