點解何君堯所謂嘅「糖衣大麻」係唔存在喺呢個世界?|陳樂行

前日立法會議員何君堯將劇集《大叔的愛》有同性戀內容形容做「係糖衣包住、裏面有大麻」,佢咁講明顯係化用咗廣東話「糖衣毒藥」一詞。但作為醫學畢業生同埋廣東話JJ,我想指出點解「糖衣大麻」呢樣嘢實際上唔存在喺呢個世界,同埋如果真係食咗呢樣嘢,都唔會達到何君堯想像嘅後果。

首先,糖衣係一種製藥技術,係喺藥物表面用糖製嘅膜包住,去掩蓋藥物本身難食嘅氣味,整到糖藥丸好似糖咁好睇,同埋減低食藥胃部不適。但係,所謂「毒品大麻」其實係講大麻嘅花部,點樣可以將一棵鬆泡泡嘅花整成一粒硬掘掘嘅糖?可能要經過繁複嘅乾燥同研磨工序先整到粒糖。

何況冇人會咁樣整呢一粒「糖衣大麻」,因為口服大麻嘅效果一般都係比唔上吸食大麻。大麻嘅精神活性成分四氫大麻酚 (Tetrahydrocannabinol,THC)會喺煙草吸食中經肺部微絲血管進入血液,上達腦部;但如果係進食「糖衣大麻」,當中嘅THC會經過胃酸同肝臟分解,結果達到腦部嘅THC就遠遠冇雪茄咁吸食咁多。對於追求致幻嘅吸食者嚟講大麻作為昂貴嘅草藥,咁樣食法就相當「嘥料」。

嗰啲大麻食品,好似曲奇、布朗尼(Brownie)咁,其實唔係「糖衣大麻」,而係「油衣大麻」。製作者要預先將大麻浸定喺油入邊加熱,將活性較弱嘅THCA(Tetrahydrocannabinolic acid)脫羧成THC,同時間油係可以形成一層保護膜包住大麻嘅有效成分,減少胃酸對THC嘅破壞,從而經腸臟吸收,致幻效果會加重。

總結而言,何君堯講得出「糖衣大麻」一詞,無論對大麻定同性戀議題都係好無知,而且引喻失義:佢口中嘅糖衣大麻,食落肚其實可以造成嘅危害都少好多。

提醒返:大麻屬香港法例第134章《危險藥物條例》所管制嘅危險藥物。非法管有或吸食、吸服、服食、注射危險藥物,最高刑罰為監禁七年及罰款100萬元。切勿以身試法。

作者:陳樂行,港語學主席,大學修讀中醫學及生物醫學。

5 1 vote
Article Rating