香港浸會大學校長衞炳江及管理層團隊今日（26日）舉行傳媒聚會，透露2021學年今年9月入學嘅本科生，喺畢業前須必修國安教育，係計普通話畢業要求之外，另一個暫時獨有嘅畢業要求。雖然呢科唔計學分，但都會做評估計分。衞炳江強調，有關課程唔淨係同政治有關，係要學埋網絡安全、環境安全及公共衞生等等。

衞炳江話，《香港國安法》係重要法例，所以學生須理解。浸大副校長周偉立表示，國安教育會放喺「聯通」課程。佢話，2021年9月起入學嘅本科生喺畢業前都要必讀國安教育，實際要求及細節將會喺新學年公布；至於現正就讀本科課程學生，校方會鼓勵他們接受國安教育，碩士生及研究生暫未有相關要求。

校方又表示，唔認為國安法實施影響招聘海外人才。浸大行政副校長暨秘書長鄒靄雲透露，至今年6月份，聘請咗逾百名來自20多個國家、30多個範疇嘅教授。