韓式泡菜（韓語：김치 ^kimchi）係韓國菜不可或缺嘅食物，但同中國無論喺食物起源以至到國際標準都有好大嘅紛爭，喺7月22號起南韓文化體育觀光部就公布咗《公共術語的外語譯名規範》嘅修正案，將韓式泡菜(Kimchi)嘅中文譯名，由原先嘅「泡菜」改做「辛奇」，等國際社會可以區分到Kimchi同中國四川泡菜。

南韓政府部門喺2013年就開始研究김치嘅新譯名，佢哋同專家分析咗4千多個中文詞彙，比對過包括廣東話嘅中國8種地方語言讀法，發現中文係冇「Kim」呢個發音，本年初喺16個候選譯名中揀咗「辛奇」做譯名。除咗因為「辛奇」同韓文發音比較似，亦都考慮到「辛奇」令人聯想起「辛辣、新奇」，音義兼備，係最合適嘅譯名。

南韓農林畜產食品部食品產業政策室長金仁中表示，希望通過修改譯名，減少「辛奇」同四川泡菜之間嘅爭議，並期待辛奇嘅世界地位能夠提高。

修正案由7月22號起實施，會用喺韓國政府同地方團體嘅文宣，唔會強制要求民間點樣翻譯。記者睇過香港嘅韓國餐廳餐單，暫時未見有餐廳將泡菜即刻改做「辛奇」。

#辛奇 #韓式泡菜 #韓國餐廳 #韓國菜 #泡菜 #四川泡菜 #kimchi #김치 #韓文 #中文 #廣東話