唔識廣東話照入「愛·回家」劇組?東涌Kirsten承諾會努力惡補 監製:唔介意廣東話差

參加《香港小姐2021》首輪面試因為風格獨特,被稱為「東涌羅浩楷」及「佛祖佳麗」嘅利愛安Kirsten,雖然未能入圍港姐,但就俾TVB睇中佢嘅人氣,好快就同佢簽咗約,更加即刻加入長壽處境劇《愛·回家》劇組,希望可以力挽無綫電視逐漸流失嘅人氣。不過,TVB有冇諗過Kirsten唔識廣東話點樣做戲呢?Kirsten就話佢呢排已經努力惡補廣東話,上網睇多啲廣東話影片,又會抄筆記學習。

記者要求Kirsten示範下學咗幾多句廣東話,Kirsten當刻支吾以對,話冇帶筆記喺身,卒之話喺中學嗰時經常聽同學講嘅一句話可以覆述,隨即講咗一句粗口,令在場記者都啞然失笑。kirsten又話表示興奮有機會加入呢個大家庭,希望為試鏡做最好嘅準備。但因為佢唔熟廣東話,即使有盡力去理解成個故事,都會睇到好迷失。

今年22歲嘅Kirsten擁有中國、菲律賓及西班牙血統,喺港姐首輪面試因為相貌奇特備受關注,再因為林作乘機抽水聲稱提名過佢而成為熱話。《愛回家》監製林建祥早前接受訪問承認,Kirsten同港姐冠軍謝嘉怡都即將加入劇組,「希望有啲新面孔試下觀眾有咩反應」,又話唔介意兩個人廣東話都咁差,覺得呢次對佢哋係好好嘅學習機會。

#kirsten #東涌羅浩楷 #佛祖佳麗 #tvb #cctvb #港姐 #香港小姐2021 #無綫電視 #粗口 #謝嘉怡 #愛回家 #廣東話